Люкс әлеміндегі сапа белгісі
Tatler Токиодан бастап Гонконг, Бангкок, Бали және Сингапурға дейінгі аралықта ең таңдаулы орындарды іріктейді. Бұл мекемелер заманауи сән-салтанат стандарттарын қалыптастырады. Олар әлемдік luxury-мәдениеттің ажырамас бөлігі саналады. Рейтинг түзуге 400-ден астам сарапшы қатысады: Tatler редакторлары, мейрамхана сыншылары, гастрономиялық және тревел-журналистер, инфлюенсерлер мен индустрия кәсіпқойлары.
Классикалық мейрамхана гидтерінен айырмашылығы, Tatler Best қонақжайлылық саласына жан-жақты қарайды. Сарапшылар тек тағам немесе сусындардан дәм татып қана қоймайды. Олар қызмет көрсету сапасын, дизайнды, атмосфераны, шарап пен бар мәдениетін және инновацияларды бағалайды. Ең бастысы бұл мекеменің қалдыратын жалпы әсері. Сондықтан мекеменің есігінен немесе кіреберісінен Tatler Best логотипін байқасаңыз, бұл нағыз сапа белгісі деп ұғыңыз. Егер жоғары деңгейдегі сервис пен мінсіз эстетика іздесеңіз, осында міндетті түрде кіріңіз. Саяхатшылар үшін Tatler Best сенімді бағдар көрсетеді. Бұл белгі мекеме қатаң сарапшылар іріктеуінен өтті деген сөз. Демек, ол өз қаласы мен аймағындағы ең үздіктердің қатарына кіреді. 2025 жылы бұл картаға Қазақстан да қосылды. Еліміздің жобалары алғаш рет Tatler Best тізіміне енді. Ал 2026 жылы рейтинг Қазақстанның ең таңдаулы мейрамханалары, барлары мен қонақүйлерінің жаңа тізімін жариялады.
Қазақстандағы Tatler Best
Қазақстанда Tatler Best рейтингі қатарынан екінші жыл жасалып жатыр. Алайда 10 қыркүйекте елімізде тұңғыш рет арнайы марапаттау салтанаты өтті. Бұл кеште The Ritz-Carlton, Almaty қонақүйіне көптеген мәртебелі меймандар жиналды. Мұнда түрлі индустрия өкілдері бас қосты. Қалыпты уақытта олардың басын бір жерге біріктіру өте қиын. Олардың қатарында мейрамхана мен қонақүй иелері, шеф-аспаздар мен бармендер, сондай-ақ бизнес, мәдениет және сән әлемінің өкілдері бар. Нәтижесінде Tatler Best жай ғана марапаттау кешімен шектелмеді. Ол үлкен кәсіби әрі зайырлы шара ретінде Алматыдағы жаңа маусымды жарқырата ашты.
Қазақстан гастрономиясы жаңа батырларын тапты
Бұл кеште Best 20 және Best in Class лауреаттары құрметке бөленді. Марапатталған мейрамханалар, барлар мен қонақүйлер бүгінде Қазақстандағы сапа мен қонақжайлылық стандарттарын қалыптастырып отыр.
- Ең таңдаулы 20 мейрамхана
- Ең таңдаулы 20 бар
2026 жылғы Best in Class тізімі өте алуан түрлі шықты. Мейрамхана саласындағы басты марапат саналатын Restaurant of the Year аталымын Akami мейрамханасы жеңіп алды. Palomar жобасы Best New Restaurant атанып қана қоймай, Best Design марапатын да қанжығасына байлады. AUYL мейрамханасы Best Innovation санатында топ жарды. Ал астаналық Selfie жобасы Best Service марапатын иеленді.
Tatler индустрия кәсіпқойлары арасынан Денис Капраловты ерекше атап өтті. Ол Best Sommelier марапатын алды. Ал The Ritz-Carlton, Almaty мейрамханасының бас кондитері Нариман Әбдіғаппаров Best Pastry Chef атанды. Rising Star марапаты Fika жобасының негізін қалаушы Инга Макогонға бұйырды.
Бар әлемі де өз батырларын тапты. Gruppo 63 жобасы Bar of the Year және Best Design атанды. Atelier жобасы Best New Bar, Lilou мекемесі Best Service, ал Adept Cocktail Bar жобасы Best Innovation марапаттарын жеңіп алды. Ал Дарья Бежина Rising Star аталымында үздік шықты.
Еліміздің ең таңдаулы қонақүйлері
Қонақүй индустриясы да өз көшбасшыларын анықтады. Hotel of the Year марапатын The Ritz-Carlton, Astana жеңіп алды. Ал салтанатты кештің өзі өткен The Ritz-Carlton, Almaty қонақүйі Best Destination аталымында топ жарды. Басқа лауреаттардың қатарында Pana Unique Semey, The Veil, Rixos Borovoe, Swissôtel Wellness Resort Alatau, Nammu Spa & Wellness, The St. Regis Astana және Tenir Eco Hotel бар. Нәтижесінде заманауи қонақжайлылық индустриясының көзімен Қазақстанның әдемі портреті жасалды. Оған ірі халықаралық қонақүйлерден бастап жаңа жергілікті жобаларға дейін кірді.
Оқи отырыңыз: Қазақстанның ең таңдаулы 10 қонақүйі
Tatler Best ауқымды кешке ұласты
Кештің ең қызығы ресми бөлімнен кейін ғана басталды. Қонақтар алдында Sadraddin ән шырқап, одан кейін DJ-сетпен afterparty жалғасты. Ресми салтанат біртіндеп ауқымды кешке айналды. Қонақтар марапаттарды бір сәтке ұмытып, билеп, емен-жарқын араласты. Бұл кеште фуршетті Yurta және Akami жобалары өз мойнына алды. Yurta мейрамханасы ұлттық асхана тағамдарын ұсынды. Қонақтар қолдан піскен нанмен ысталған жая, түрлі ет дәмділері, бауырсақ ассортиі, сүзбе қосылған карамельденген өрік және қымыздың төрт түрінен дәм татты. Akami өз кезегінде фирмалық тіскебасарларын тартты. Олардың қатарында трюфель қосылған асшаян да бар. Ал сусындар мен көңіл күйге Beluga және Martini жауап берді. Қонақтардың бокалдары ортаймады, ал кештің көркі қыза түсті.
Кештің тағы бір ерекше бөлігі серіктестер аймағы болды. Freedom Mastercard Tatler Best жобасының ресми серіктесі атанса, ал Freedom бас серіктес болды. Қонақтар жаңа жобалармен танысып, араласып, естелік суретке түсті. Бренд-аймақтар жай ғана декорация болып тұрмай, кешпен бірге біртұтас өмір сүрді.
Бұл көрініс Tatler Best философиясын өте дәл жеткізді. Қонақжайлылық бұл дәмді тамақ, адамдар, әуезді музыка, ерекше кеңістік, керемет энергия және кештен кейін қалатын жылы естелік. Tatler Asia жобасының бір әдемі дәстүрі бар. Сингапурда түн ортасы ауғанда қонақтарға teochew porridge ұсынады. Бұл дегеніміз түрлі қоспалар салынған жылы күріш ботқасы. Ол ұзақ кештен кейінгі өзіндік comfort food қызметін атқарады. Алматыда бұл дәстүрді өзінше жаңартты. Кеш түнге ұласқан шақта The Ritz-Carlton мейрамханасы қонақтарға саңырауқұлақ қосылған жылы ризотто тартты. Оны тікелей үлкен пармезан ірімшігінің ішінен салып берді. Бұл тамаша кештің мінсіз нүктесі болды. Коктейльдер, музыка, би мен толассыз әңгімелерден кейін ыстық әрі хош иісті ризотто адамға қайта күш береді. Ол нағыз ғажап кеш әрдайым дәмді аспен аяқталуы тиіс екенін еске салады.
