Dior
Джонатан Андерсонның қолынан шыққан Dior өзінің үйреншікті қатаңдығынан арыла бастағандай: мінсіз пішілген формалар мөлдір шифон, органза мен желбіршектердің арасына сіңіп кетеді. Сән үйінің басты кодтары — Bar жакеті, La Cigale көйлегі мен классикалық тейлоринг — өз орнында қалғанымен, әлдеқайда жұмсарып, әуелеп тұр. Тіпті Уэльс ханзадасының торкөзі мен жіңішке жолағы бар жакеттер органзаны еске салатын өте жеңіл матадан тігілгенімен, көзге кәдімгі костюмдік жүн мата сияқты көрінеді. Андерсон Dior-дың танымал стилін сол қалпында сақтайды, тек оның иығынан тарихи ауырлықты сыпырып тастағандай.
Maison Margiela
Гленн Мартенстің Maison Margiela-да кутюр топтамасымен дебют жасағанына бір жылдан сәл астам уақыт өтті. 2027 жылғы көктем-жаз маусымында ол алдыңғы жұмыстарындағы драматизмді сәл бәсеңдетіп, эксперимент пен күнделікті киімді өмірге сай үйлестіреді. Деконструкция, концептуалдылық және Margiela гардеробының таныс элементтері әлі де оның басты назарында, алайда топтаманың ең ұтымды тұсы – эксцентризм мен киюге ыңғайлылық тепе-теңдікке келген жер. Есте қалатын детальдар көп: винтажды гүл принттері бар матадан тігілген, фирмалық мақта таспалармен буылған көйлектер мен белдемшелер, сондай-ақ жаншылған күміс ыдыстардан жасалған сәндік сауыттар.
Saint Laurent
Энтони Ваккарелло Saint Laurent-дағы он жылдық мерейтойын топтамамен атап өтті; оның қызметтен кетуі мүмкін деген сыбыстар тараған кезде бұл жинақ ерекше символдық мағына тапты. Көрсетілім алдында дизайнер журналистерге қара калла гүлдерінің шоғын жолдап, сұхбат бермейтінін хат арқылы ескерткен еді. Мұнда алтын түс мүмкін барлық фактурада кездеседі: органза, шифон және гипюрден бастап парча, жаккард, металдандырылған мақта мен латекске дейін. Saint Laurent-ның танымал кодтарын — сафари-жакеттерді, қарындаш-белдемшелерді, костюмдерді, коктейль көйлектерін және Ив Сен-Лоранның әйгілі алтын тренчін еске салатын плащтарды — Ваккарелло жаңаша пайымдаған. Финал, керісінше, түгелдей қара түсті болды, ал модельдер сөмкесіз шықты — сондықтан барлық назар тек киім мен силуэттерге аударылды.
Dries Van Noten
Джулиан Клауснер 1950-шы жылдардағы голливуд актрисасының бейнесін негізге алған, бірақ оны қызыл кілемдегі емес, түсірілім алаңынан көшеге шыққан сәттегі қарапайым өміріндегі қалпында көрсетеді. Сондықтан коктейль көйлектері, інжу-маржан мен опера қолғаптарының қасынан кәдімгі күнделікті киімдер де табыла кетеді. Dries Van Noten-ге тән түстермен жұмыс істеу шеберлігі 1950-1960 жылдардың палитрасынан айқын байқалады: лимон сарысы, нефрит пен зүбәржат жасылы, опа-қызғылт, лаванда, аспан көк, маржан, шие, көгілдір және қанық «лас-вегастық» реңктер. Клауснер оларды күтпеген әрі күрделі үйлесімдерде араластыра отырып, дәуірді тікелей қайталамай-ақ ретро сезімін тудырады. Ескі Голливуд стиліндегі постерлер сатин көйлектер мен мөлдір белдемшелердегі принттерге айналған. Тіпті көрсетілімге шақыру билетінің өзі ойдан шығарылған Lacquera and Lace фильмінің афишасы іспеттес жасалыпты.
Schiaparelli
Дэниел Роузберри топтаманы Schiaparelli-дің тарихи кодтарының бірі – кешкі жакеттің айналасына құрастырған. Осыдан жүз жылдай бұрын Эльза Скиапарелли кеш барысында сәнділік деңгейін өзгертуге мүмкіндік беретін dinner suit ойлап тапқан еді. Роузберри осы идеяны қайта әкеліп, жакетті заманауи гардеробтың негізіне айналдырады. Топтамада Schiap jacket-тің сегіз нұсқасы ұсынылған: жарқын мұрағаттық реңктерден бастап, күрделі әрлеуі бар барқыт пен сатин үлгілеріне дейін бар. Топтаманың басты ерекшелігі – конструктор принципінде жатыр: фирмалық силуэттер жекелеген киімдерге, белдемшелерге, шалбарлар мен жакеттерге бөлініп, оларды қалауыңызша үйлестіруге жол ашады.
Loewe
Джек Маккалоу мен Лазаро Эрнандес америкалық sportswear стилін сән үйінің испандық мұрасымен ұштастыра отырып, Loewe-нің жаңа тілін қалыптастырып келеді. Біршама эксперименттік болған алғашқы топтамалардан кейін дуэт нағыз гардеробта елестету әлдеқайда оңай киімдерге бет бұрды. Мұнда америкалық күнделікті киім үлгілеріне ишаралар көп: New England Prep, баскетбол майкалары, поло, спорттық желбегейлер мен бомберлер. Бірақ әр үйреншікті киімнің ішінде Loewe-ге тән күтпеген бір бұрылыс жасырынып тұрады. Бір қарағанда қарапайым көрінетін дүниелердің орындалуы өте күрделі болып шығады: сұр свитшот тұтастай моншақпен кестеленсе, жолақты «мақта» жакеттер іс жүзінде жұқа өңделген былғарыдан тігілген. Түс те Loewe-нің жаңа формуласының маңызды бөлшегіне айналған. Топтамада кляйн көгі, лимон сарысы, жалбыз, қызғылт сары және жасыл түстер кездеседі. Жарқын палитра тіпті ең қарапайым спорттық киімді де сән үйінің қолтаңбасына лайық етіп көрсетеді.
Celine
Celine бұрынғыдан да еркін әрі жанды бола түскен. Preppy-кодтар мен ұқыпты париждік талғампаздық айқын сезілген алғашқы топтамалардан кейін Майкл Райдер өз ауқымын кеңейтуге кірісті. Топтамада тар шалбарлар мен көлемді силуэттер, қатаң тейлоринг пен романтикалық киімдер, классикалық пальтолар мен жарқын ою-өрнектер қатар өріледі. Дизайнер танымал элементтерді клишеге айналдырып алмай, заманауи париждік гардеробты қалай жинауға болатынын шебер көрсетеді. Райдер қара көйлек, былғары күртеше, иығы айшықты жакет немесе тренч сияқты өте түсінікті заттарды алады да, олардың мінсіздігін бұзып тұратын бір детальды – үлкен сөмкені, ұзын моншақты, бау тәрізді белдікті, түсті акцентті немесе күтпеген стилизацияны қоса салады.
Hermès
2027 жылғы көктем-жаз маусымында Надеж Ване үшін басты шабыт көзі ауа болды – оны көзбен көру мүмкін болмаса да, сезінуге болады. Бірнеше күңгірт әрі қатаң топтамадан кейін Hermès ашық әрі жұмсақ сипатқа ауысқан: қою палитраның орнын кремді ақшыл, сары және қызғылт сары түстер басса, былғарының торкөзбен, трикотажбен және жартылай мөлдір маталармен үйлескен әлдеқайда жұқа әрі жеңіл түрлері қолданылған. Мұнда функционалдылық дизайнның өзіне айналған. Сыдырмалар киімнің пішінін өзгертуге мүмкіндік береді: шалбардың екі жағын ашып қоюға, көйлектің ұзындығын реттеуге және жакеттерді түрлендіруге болады. Киім дене бітімі мен ауа райына бейімделіп, өз желдету жүйесі бар сияқты көрінеді.
Miu Miu
Жаңа топтамада Миучча Прада спорттық киімге эксперимент материалы ретінде қарайды: егер оған талғампаздық қосса, не болар еді? Miu Miu-да джерси, деним, былғары және утилитарлық заттар мінсіз тейлорингпен, жейде-көйлектермен және кешкі әрлеумен бетпе-бет келеді. Сонымен қатар киімдердің үйреншікті рөлдері орын ауыстырады: спорттық жоғарғы киімдер сәнді қабаттардың негізіне айналса, кестеленген бра джемперлер мен свитшоттардың сыртынан киіледі. Әсіресе айқасқан баулар тәсілі өте қызық шыққан, олардың көмегімен джинсылардың, белдемшелердің, көйлектер мен аяқкиімнің пішінін тікелей дененің үстінде тұрып-ақ өзгерте беруге болады.
Jean Paul Gaultier
Jean Paul Gaultier-дегі жұмысын бастаған сәтте Дюран Лантик сән үйінің мұрағатына үңілуден үзілді-кесілді бас тартқан болатын. Ол алдымен өзінің жеке әлемін ойлап тауып, содан кейін ғана бұл есікті ашқысы келетінін айтқан еді. Енді дизайнер Gaultier-дің танымал кодтарына бет бұрды, бірақ оларды жай ғана қайталамай, көлемге, дене бітіміне және ерекше пропорцияларға деген өз қызығушылығы арқылы қайта пайымдайды. Конус тәрізді бюстгальтер, мүсіндік формалар, корсеттер, провокациялық көлемдер мен театрландырылған бас киімдер мұнда жаңаша оқылып, заманауи юмор сезімімен шебер ойнатылады. Сонымен қатар Лантик топтамада күнделікті киюге әбден жарамды көптеген киімдерді қалдырған, бірақ олар тым іш пыстырарлық көрінбеуі үшін дерлік әрқайсысына қандай да бір абсурдты деталь қосып отырады.
Chanel
Матье Блази сән үйінің танымал кодтарын сақтай отырып, Chanel-ді шамадан тыс қатаңдықтан арылта түсуде. Топтаманың негізіне еркіндік идеясы алынған: Grand Palais подиумының төбесінде жарқыраған құстар тобы қалықтап жүрсе, мөлдір маталар, өңделмеген жиектер мен ұшқыр силуэттер үйреншікті Chanel-ді әлдеқайда жеңіл әрі динамикалы етеді. Блази Габриэль Шанель бейнесінің түрлі қырларын қайта ой елегінен өткізеді: қатаң силуэттер мен ерлер гардеробынан бастап жалаңаш денеге тікелей киілетін классикалық жакетке дейін. Бритни Спирстің Gimme More әнімен түйінделген финал да Chanel-дің жаңа интонациясын айқындай түседі: паңдық пен музейлік сипат азайып, қозғалысқа, жеңілдік пен еркіндікке кең жол ашылған.
Louis Vuitton
Ұшатын көліктері бар футуристік декорациялардың артында Louis Vuitton-ның өте өміршең идеясы жасырынып жатыр – ол киімді жеңілірек, қарапайым әрі ыңғайлы ету. Ақ түсті жартылай мөлдір көйлектер, жұқа трикотаж, жібек белдемшелер, кардигандар, жеңіл пальтолар мен нейлон анорактар өте қарапайым әрі заманауи көрінеді. Бірақ бұл қарапайымдылық алдамшы: Жескьер киім денеге мүлдем сезілмеуі үшін маталармен және киімнің құрылымымен батыл эксперимент жасайды. Мәселен, кейбір пальтолардың салмағы кәдімгі футболкадан да жеңіл тартады. Дизайнердің өзі бұл тәсілді «ағынды эргономика» деп атайды – киім адаммен бірге қозғалып, оның екінші терісіне айналуы тиіс.
