Қазақстандық модельдер туралы сөз қозғалғанда, ойымызға ең бірінші келетін тұлға – Бибісара Шәріпова. Maybelline, Uniqlo, Etam, Gap секілді алпауыт брендтердің бет-бейнесіне айналған ол Нью-Йоркте таңғаларлық мансап жолын қалыптастырды. Бибі бүгінде әлемнің әр түкпірінде ауқымды түсірілімдер мен жобаларға қатысып, өз портфолиосын толықтыруды жалғастырып келеді. Ол Tatler Kazakhstan журналының алғашқы саны үшін «арман қала» Нью-Йорктегі өмірдің шынайы бейнесі мен «қиял фабрикасының» тасасында не жатқаны туралы сыр шертті.
Мен Бибі туралы өте көп естіген едім. 2014 жылы алматылық Boulevard инди-журналында жұмыс істей бастағанымда, екі қазақстандық модельдің есімі ел аузынан түспейтін. Олар – Алена Субботина мен Бибісара Шәріпова болатын. Бұл қыздар қазақстандық «асқақ арманның» символына айналды. Олар шағын қалаларда дүниеге келсе де, әлемнің ең қатал әрі тартымды мегаполисі Нью-Йоркті бағындыра білді. Олардың бейнелері билбордтар мен мұқабаларда жиі көрінетін және туған елінің сән әлемі оларға табынатын. Тіпті қазір біреу қазақстандық модельдердің келбеті туралы сұраса, менің көз алдыма бірден Бибі келеді.
Алайда, біздің алғашқы әңгімеміз араға он жыл салып барып қана сәтті өтті. Мен Париждегі жұмыс күнімді аяқтап жатқан уақытта, Бибі Нью-Йорктен түскі үзіліс кезінде хабарласты. Екеуміз де сән әлемінде мансап құрып жүргендіктен, бірден ортақ тіл таптық. Алғашқы қадамдар мен көшу туралы үйреншікті сұрақтардан кейін, біз маңызды бір ойда түйістік. Бұл индустриядағы ең қиын нәрсе алғашқы серпіліс жасау емес екен. Алғашқы табыс көп жағдайда, тіпті жүздеген талпыныстан кейін де, кездейсоқ келуі мүмкін. Ең қиыны – сол биікте қалу, дәлірек айтсақ, өз өміріңді тағдырдың құбылмалы сәттеріне тәуелді болмайтындай етіп құра білу болып табылады.
«Модельдік кәсіпте бәрі тез өзгеруі мүмкін, тіпті бұл жағдай жарылысқа ұқсайды. Бір сәтті образ, бір көрсетілім немесе желіде тараған виралды видео арқылы сенің түрің барлық жерде пайда болады. Кастинг-агенттер сені алдын ала брондап, үлкен жобаларға шақыра бастайды. Сол кезде бүкіл әлем алақаныңда тұрғандай сезіледі. Бірақ келесі маусымда-ақ сенің типажың трендтен шығып қалуы немесе жаңа жұлдыз пайда болуы мүмкін. Осындай сәттерде өзіңді қалай ұстайтының сенің кәсіби деңгейіңнің нақты көрсеткіші болып саналады», – дейді Бибі.
Бибі Қазақстанның солтүстігіндегі Степногорск қаласында туып-өскен. Модель болу оның жоспарында болған жоқ, өйткені ол өнертанушы болуды армандайтын еді. Алайда анасының интуициясы алдамапты. Халықаралық агенттіктің скауттары келгенде, ол қызын кастингке апаруды жөн көреді. Бибі ол кезде 15 жаста болатын. Көп ұзамай оның алғашқы жұмыс сапары Таиландқа жол түседі. Сән әлемінде Азия нарығы маңызды кезең болып саналады. Мұнда қыздар камерамен жұмыс істеп, бизнестің негізін түсінеді және қаржы табады. Еуропа нарығы беделді болғанымен, ол жақта гонорар әрқашан төменірек болады және негізінен exposure, яғни танымалдылық үшін жұмыс істейді. «Менің Таиландта да жолым болды. Алғашқы түсірілімім сол кездегі өте танымал фотографпен өтті. Бәрі соншалықты сәтті болғаны сондай, мен бұл саланың менің стихиям екенін түсіндім», – деп бөлісті модель.
Одан кейін оның мансап жолы биіктей берді. Үш айлық Таиланд сапарынан кейін Бибі Нью-Йоркпен келісімшартқа отырады, одан кейін Еуропа астаналары жалғасады. Нағыз мінез шыңдалатын кезең де осы еді. Бірнеше жылға созылған тұрақсыздық пен оқу мен жұмыс арасындағы таңдаудан кейін, 22 жасында модель АҚШ-қа көшу туралы саналы шешім қабылдады. «Үлкен қалаларда, әсіресе шетелдік ретінде қалу өте қиын болады. Мұнда ең мықтылар жиналады, сондықтан бәсекеге төтеп беру үшін темірдей төзім керек. Бірақ ең бастысы – осы қалада сені ұстап тұратын тірек табу қажет. Біреу үшін бұл жеке қарым-қатынас болса, мен үшін – жұмысым болды. Менің типажым мұнда сұранысқа ие болды. Содан бері бірнеше жыл өткен соң түсінгенім: бұл тек сәттілік емес, жасаған әрекеттерімнің қисынды нәтижесі екен. Мен мұнда болу құқығына нағыз еңбегіммен қол жеткіздім».
Қазір Бибі 30 жаста. Оның дауысынан байсалдылық пен ішкі тепе-теңдік сезіледі. Сән индустриясының өзіндік ерекшелігі сол – әрдайым сені таңдайды, ал сенің таңдау жасауың өте сирек кездеседі. Сондықтан өзіңді өзгемен салыстырмау немесе сенімділікті жоғалтпау мүмкін еместей көрінеді. Қазір Бибі толығымен коммерциялық жобаларға ауысты. Оның жүзін Uniqlo мен Etam жарнамаларынан көруге болады, ал жұмыс кестесі тұрақты саяхаттауға мүмкіндік береді.
Бибіден мұндай ішкі сабырды қайдан алатынын сұрағанымда, ол қысқа ғана: «Тәжірибе», – деп жауап берді. «Бірде мен Ermanno Scervino брендіне кастингтен өттім. Агентім хабарласып, мені таңдағанын айтқанда төбем көкке жеткендей болды. Түсірілім күні толқып үйден шықтым. Бірақ метрода келе жатқанымда агент хабарласып, менің образымды көрсетілімнен алып тастағанын айтты. Сол кездегі өкінішті сөзбен айтып жеткізу мүмкін емес еді – мен жылап отырып анама хабарластым. Бірақ жүздеген осындай сәтсіздіктен кейін түсінгенім: бұл – жұмыстың бір бөлігі екен. Сені әрдайым біреулер таңдайтынын және бұның таза сәттілік екенін жай ғана мойындау керек. Модельдік мансап кардиограмма сияқты болады, сәтсіздіктен кейін міндетті түрде сәтті жоба келеді. Осыны стоикалық тұрғыда қабылдап үйренгенде, бәрі өз орнына келеді».
Мен жас туралы сұрақты абайлап қойдым. Бұрын сән әлемі Леонардо ДиКаприоның «ережесімен» өмір сүретін еді: 23-25 жастан кейін кейбір қыздар үшін, сирек жағдайларды есептемегенде, «зейнет» кезеңі басталатын. Бибі жымиып: «Қазір индустрия қатты өзгерді. Мен 20 жаста болғанымда, кастингтерде жасымды 18 деп айтуымды сұрайтын еді. Ал бүгінде брендтер керісінше 30, 40, тіпті 50 жастағы әйелдерді іздейді. Бұл тұрғыда сән әлемі әлдеқайда инклюзивті бола бастады және сұлулық ұғымы кеңейді», – деді.
Сән әлеміндегі мұндай оң өзгерістер Бибіге болашаққа батыл жоспар құруға жол ашты. Бірақ бәрі оңай емес. «Өз ортамды тым жаман етіп көрсеткім келмейді, бірақ модельдерге көп нәрсе байланысты емес. Түсірілім тобы мамық куртка киіп жүргенде, менің қар үстінде жалаң аяқ түскен сәттерім болды. Немесе қатты желден вагоншамыз ұшып кете жаздаған түсірілімдер есімде. Сонымен қатар, бәрі әрқашан соңғы сәтте шешіледі. Әжем қайтыс болғанда, мен үйге қайта алмадым, өйткені маған өте маңызды келісімшартты бекітіп қойған болатын. Бұл ортада үнемі көзге көрініп жүру маңызды болып табылады. Егер бұл жолы бас тартсаң, келесі жолы агентің хабарласпауы мүмкін».
Мен кез келген эмигрант үшін маңызды сұрақты қойдым: «Көшкеннен бері сенің бойыңда не өзгерді?». Бибі ойланбастан: «Менің бүкіл болмысым өзгерді десем болады. Мен ешқашан ортаның гүлі болған емеспін, бірақ Америка сені басқаша қалыпқа салады. Әсіресе модель ретінде сен түсірілім алаңына жақсы көңіл-күй мен атмосфера сыйлауың керек. Мұнда адамдардың адамдармен жұмыс істейтінін және оларға позитивті энергия беретін серіктес керек екенін түсінесің. Біздің елдерде бұлай қалыптаспаған, бірақ АҚШ-та аман қалу үшін өзіңді қолға алып, күлімсірей білу маңызды болып табылады. Бұл тәсіл жалпы өмірде де көмектеседі», – деп жауап берді.
Орыстың ұлы ақыны Пушкин кезінде бақыт жоқ, тек тыныштық пен ерік бар деп еді. Бибінің сөйлеу мәнері мен өзін ұстауынан мен осы екі қасиетті айқын байқадым. Біз келесі айда ол түсірілімге келетін Парижде кездесуге уағдаластық. Маған оның мансабында әлі талай бағындырылмаған биіктер күтіп тұрғандай көрінеді..
ОҚИ ОТЫРЫҢЫЗ: Бибі Шәріпова – Ulyana Sergeenko мерейтойлық топтамасының басты кейіпкері болды