Брюссель төрінде 42-ші Art Brussels көрмесі өз есігін айқара ашты. Бес бірдей тақырыптық бөлімді қамтитын экспозицияға 27 елден келген 138 галерея қатысып жатыр. Бұл беделді шара дәстүрлі түрде бас серіктес – Delen Private Bank қолдауымен өтеді.
Биылғы маусымның ең басты жаңалығы – Horizons бөлімі. Бұл жаңа секцияның кураторы ретінде Брюссельдегі Centre Pompidou орталығының аға кураторы Деврим Баяр тағайындалыпты. Арнайы жоба аясында ерекше сценографиямен біріктірілген алты ауқымды туынды жұрт назарына ұсынылып отыр. Ұйымдастырушылардың айтуынша, Horizons бөлімі көрменің кеңістіктік көкжиегін кеңейтіп, оның мұражай деңгейіндегі өршіл жобаларды қолдауға деген ұмтылысын тағы бір мәрте дәлелдеп бермек.
Көрменің ішіне үңілсек:
Prime: 83 жетекші галерея әлемге әйгілі шеберлер мен заманауи суретшілердің туындыларын паш ететін негізгі бөлім.
Solo: жекелеген туындылар цикліне тереңірек бойлауға мүмкіндік беретін 26 дербес экспозиция.
Forward, 68: өнерге 1968 жылдан (Art Brussels көрмесінің іргесі қаланған жыл) бері ықпал етіп келе жатқан әралуандықты, эксперименттер мен жаңашыл қозғалыстарды зерттейтін 11 галерея.
Discovery: болашағынан зор үміт күттіретін 38 халықаралық суретші еуропалық коллекционерлер үшін жаңа көкжиектер ашатын дербес көрмелер немесе әзірге есімі көпке таныла қоймаған екі автор арасындағы кураторлық диалог форматында өнер көрсетеді.
Art Brussels 2026 көрмесі жексенбі, 26 сәуірге дейін жалғасады.
ОҚИ ОТЫРЫҢЫЗ: Қазақстан 2026 жылғы Венеция биенналесінде несімен таңғалдырмақ? Куратор Сырлыбек Бекботамен сұхбат