Ambush — дизайнер Юн Ан мен оның рэпер күйеуі Verbal ашқан, жапон бренді. Инновациялық әрі авангардтық әшекей бұйымдарымен танымал. Ambush брендінің ерекшелігі күнделікті қолданылатын заттардан шабыт ала отырып жасалған, ірі әрі айқын аксессуарларында. Дизайнерлердің көзіне кеңсе тауарлары да, түйреуіш де, оттық та заманауи әшекей бұйымы болып көрінеді. Мұның бәрі қарапайым заттарды қайта жаңғыртуды қамтитын, жапондық «ремикс мәдениетін» айқындайды.

Дизайнер Надин Гон шабытты балалық шағы мен поп-мәдениеттен алады. Ол адамдарды балаларға тән қуаныш пен шаттыққа бөлеуді мақсат етеді. Надин бургер, Lego фигуралары немесе қарындаш сияқты қарапайым заттарды зергерлік шедеврге айналдырады. Дизайндары кей кезде тым ойнақы болып көрінгенімен, автор туындыларын тек бағалы әрі сапалы материалдардан жасайды. Мысалы, Надиннің әйгілі Veggie Burger Ring сақинасында ингредиенттерді бейнелеу үшін әр түрлі асыл тастар қолданылған болатын: гауһар тас — «күнжіт» пен «пияз», рубин — «кетчуп» пен «қызанақ», зүбәржат — «жасыл салат», түрлі-түсті сапфир – «қыша».

Alison Lou — зергерлік бұйымдарын әзіл қоса жасап танымал болған, американдық бренд. Паста түрлері, круассан не эмодзи бейнесіндегі әшекей бұйымдар брендтің ерекше стилін айқындайды. Ең танымал туындыларының бірі — Match Stack Ring сақинасы. Дизайны сіріңкені айнытпай бейнелейтін бұйым алтыннан, эмальдан және гауһар тастан жасалған. Бренд әзіл мен салт-салтанатты жақсы ұштастырады.

Негізін журналист Наталия Архангельская қалаған Letters and Stones бренді зергерлік өнерге деген ойнақы әрі иронияға толы көзқарасымен ерекшеленеді. Бренд алтыннан, күмістен және асыл тастардан жасалған, ерекше әшекей бұйымдарын ұсынады: «Letters and Stones туындылары, тіпті салмақты дегендері де, адамды күлдіруі тиіс. Оларды мақтан тұтып, бірақ тым салмақты болып кетпей тағыңыз». Фуршет коллекциясы — брендтің ең жарқын жұмыстарының бірі. Мұнда классикалық коктейль таяқшасына шаншылған, нефриттен жасалған, ішінде лағыл «бұршақ» жасырылған, зәйтүн бейнесіндегі танамоншақ бар,. Сонымен қатар коллекцияға алтыннан жасалған, азиялық таяқшаға шаншылған, ақық «асшаян» кіреді.

Marland Backus — қазіргі таңда Токиода тұратын, Бруклиндік зергер-дизайнер. Әшекей бұйымдары — дәстүрлі моншақ пен шаш сияқты материалдарды пайдаға асыратын, классикаға деген иронияға толы көзқарас. Дизайнер материал не стильмен шектелмей, бұрын-соңды болмаған туынды жасауды мақсат етеді. Туындылары бір-біріне ұқсамағанымен, концепциясы бір — олардың бәрі балалықты заманауи дизайнерлік шешімдермен ұштастырады. Дизайнердің ең жарқын туындылары — Traffic Jam Necklace, яғни ойыншық машиналардан жасалған алқа, және үлкен The Big Ring сақинасы.

Мария мен Евгений Шишкиндер негізін қалаған recoulage брендінің идеясы бардың еденінде пайда болған екен. Мария еденде жатқан шымырлы шарап бөтелкесінің плакеткасына қарап, оны зергерлік сақинаға ұқсатыпты. Брендтің атауы да шымырлы шарап тарихына байланысты: «recoulage» — бөтелкеден газдың не сұйықтықтың ағып кетуі. Бүгінде коллекция аясында сақиналар, сырға және күміс пен жезден жасалған, дәл сол шампан плакеткасы пішініндегі алқа ұсынылады.