Сағат пішінді пицца болды ма, әлде пицца 12 тілімге бөлініп сағат бетіне бедерленді ме? Мақаладан біліңіз!
Rolex дәстүрге берік, консервативті компания ретінде жұрт арасында белгілі. Жаңа модельдерді сирек шығарады және бір реттік жылтырлақ коллаборациялардан бойларын аулақ ұстауға тырысады. Бар абыройды асығыс эксперименттермен былғаудың қажеті жоқ шығар деген болу керек. Алайда, бұл ережелердің де бұзылатын кезі бар екен. Rolex-тің ең танымал сирек модельдерінің бірі – Air-King пен Domino’s Pizza арасындағы коллаборация сағатсүйер қауымның назарын өзіне бірден аударды. Бұл сағаттардың техникалық және эстетикалық тұрғыдан әу бастағы Air-King модельдерінен еш айырмашылығы жоқ. Ерекшелігі – циферблаттағы қызыл-көк түсті домино формасындағы Domino’s Pizza логотипі ғана. Бастапқыда бұл модель үздік қызметкерлерге берілетін марапат ретінде шығарылған. Бірақ уақыт өте келе, бұл топтама сағат коллекционерлерінің аңдып жүріп сатып алатын аңсарына айналды.
Rolex сағаттарының сирек үлгілерін анықтау үшін қағидалар жеткілікті-ақ. Солардың бірқатары мыналар: бастиек қорғауынсыз шыққан Submariner; қызыл жазуы бар Sea-Dweller; күміс циферблатты Serti; «Mercedes» пішіндес сағат тілдері жоқ модельдер; Day-Date үлгісіндегі гильоше өрнегі, немесе пиццерия логотипі бар қарапайым Rolex. Соңғысының тарихы сонау 1970 жылдары басталған. Domino’s Pizza негізін қалаушы Том Монаган өз менеджерлеріне аптасына 20 000 доллардан астам табыс тапқаны үшін сағат сыйлауды шығарады. Алғашында бұл сағаттар Seiko брендінен болса, кейін оларды Rolex Air-King сериясына ауыстырған. Қызметкерлер арасында бұл үлкен ынта туғызған деседі. Идентификациялық нөмірі 5500 болатын алғашқы Air-King сағаттары 1957 жылдан 1980 жылға дейін шығарылған. Кейінірек Том тапсырманы күрделендіріп, аптасына 25 000 доллар табыс табуды талап етеді. Әрі бұл көрсеткіш төрт апта бойы сақталуы керек болады.
1981 Rolex Oyster Perpetual "Domino's" Air King Модель 5500 | Фото: hqmilton.com
1 / 1