«Сағат сыйлау — қоштасудың белгісі» деген ырым бар. Алайда Cartier сағатын сыйлыққа алған адамның бұл нанымға сенуі неғайбыл. Корпусы 750-сынамалы сары алтыннан жасалып, бұрамасы жақұт кабюшонмен безендірілген, ал бауы аллигатор терісінен тігілген салтанатты жасыл түсті Tank Louis моделі. Мұндай сыйдың ырымшыл жандардың да, скептиктердің де көңілінен шығары сөзсіз.

Edie Parker бренді оттық ілінген сөмкелерімен танымал. Ал жаңа жылдық коллекция желе торт үлгісіндегі әдемі әрі ерекше үстел оттықтарынан құралған. Edie Parker оттықтары темекі тартатын адамдарға ғана емес, сондай-ақ бірегей дизайнға қызығатын жандарға да ұнары сөзсіз. Оттықты интерьер элементі ретінде де, хош иісті майшам ретінде де қолдануға болады. 

Жаңа жылды қарсы аларда ниетіңіз ақ, ойыңыз таза және жүрегіңіз ашық болғаны жөн. Burner and Sage бренді ұсынған Mind жинағы кеңістікпен қоса сананы тазартып, позитив энергияға арнап орын босатуға және де бар қиыншылықты өткен жылда қалдыруға көмектесетін ғажап құрал болмақ. Жинаққа өңделген алюминийден жасалған шағын, органикалық пішінді табақша мен құрғақ сәлбен кіреді. Бұл — тіпті өзін саналы да ашық санайтын адамдар үшін де таптырмас сыйлық. 

IN GOLD WE TRUST PARIS атты француз бренді ұсынған алтын тарақ — шаш тарау үшін ғана емес, сәнді аксессуар ретінде пайдалануға да болатын ерекше зат. Тараққа бекітілген, алынып-салынатын алтын тізбекті мойынға әшекей ретінде тағуға болады. Брендтің атауы америкалық In God We Trust (біз құдайға сенеміз) ұранына ұқсас келетінін байқаған боларсыз. Ерекше әрі креатив заттарды ұнататын адамдарға арналған сыйлық екені сөзсіз. 

Бүгінде салпыншақтар сән әлемінде үлкен сұранысқа ие. Әсіресе сөмкеге көптеп ілінген салпыншақтар әсерлі көрінеді. Сыйлықтардың ішінде осы бір кішігірім аксессуарға тоқтам жасасаңыз, биыл көптің көңілінен шыққан ALAÏA бренді ұсынған жүрек пішіндес Le Coeur Cloche салпыншағын қарастырып көріңіз. Le Coeur Cloche тіркесі француз тілінен «Жүрек қоңырауы» деп аударылады. Сиқырға толы Жаңа жыл түні қызыл жүрек үлгісіндегі салпыншақ сүйіктіңізге ыстық сезіміңізді жеткізуге көмектеспек. Стиль мен талғамды айқындайтын сыйлық. 

Жақын адамыңызға өз қамқорлығыңызды білдіргіңіз келе ме? Ендеше LOEWE бренді мен жапон суретшісі Суна Фудзитаның коллаборациясынан туған жұмсақ әрі жылы шарфты тарту етіңіз. Шарфтың бетіндегі шұбар ою жай принт емес, Фудзитаның поп-арт стиліндегі авторлық интерпретациясы болып келеді. Пайдалы әрі көңілді, әсіресе заманауи өнер туындыларын жақсы көретін жандар үшін таптырмас сыйлық. Мұндай мойынорағыш суық күндері жылытып қана қоймай, кез келген образға жарқын акцент сыйлары сөзсіз. 

Сәні мен салтанаты жарасқан сыйлық іздесеңіз, Tiffany & Co. ұсынған Bone Cuff білезігіне назар аударып көріңіз. Дизайнер Эльза Перетти ұсынған адам сүйегіне ұқсас бірегей аксессуар коллекциялық әшекей болып саналады. Көлемді дизайнына қарамастан, білезік қол анатомиясын ескере отырып жасалған, сондықтан да оны тағу өте ыңғайлы. Тағы бір ерекшелігі, Bone Cuff білезігінің оң және сол қолға арналған нұсқалары бар. Демек, бірден екі білезікті сыйлаған дұрыс. Біреудің бағы жанғалы тұр!

COMPLETEDWORKS — зергерлік бұйымдар мен интерьер элементтерінің дизайнын жасауға жаңашылдықпен қарайтын, британдық бренд. Қара түсті інжу белдемшелермен сәнделген Pearly Pearl вазасы шағын өнер туындысы іспетті. Жеке кеңістігін асқан талғаммен безендіруді ұнататын адамдарға арналған сыйлық. Вазаны кішігірім гүл шоғымен толықтырып, сыйлықтың сәнін арттыруға да болады.

Шахмат — ежелден келе жатқан интеллектуалды ойын әрі спорт түрі. Ralph Lauren Home ұсынған Fowler Chess шахмат тақтасы — ұрпақтан-ұрпаққа мұра қылып қалдыруға болатын, ғажап сыйлық. Сонымен қатар Fowler Chess тақтасы кез келген интерьердің сәнін кіргізумен қатар, отбасы мүшелері не қонақтармен бас қосқанда, бір мезгіл шахмат ойнап, үйдің берекесін кіргізеріне сенім мол. 

Jacquemus ерекше әрі стильді аксессуарларымен, әсіресе сөмкелерімен танымал. Жаңа La Petite Pochette Rond Carré — әйгілі Le Chiquito моделінің орнын басар бұйым. Сөмке сәнді ланч-пакетке ұқсас пішінмен және ірі металл бөлшектерімен көзге түседі. Мұндай сөмкені ұдайы ел назарында болғысы келетін жандарға сыйлаған абзал.

Жаңа жыл түніне романтикалық әрі салтанатты сыйлық тарту еткіңіз келе ме? Ендеше сүйіктіңізге Marie Lichtenberg ұсынған құпияға толы локетті сыйлаңыз. Әр локет — 14 не 18 карат алтыннан қолдан жасалған зергерлік өнер шедеврі. Бұл сыйлықтың бір ерекшелігі бар. Локетке фото, жазба не кішігірім тұмар салып, сыйлық иесінен басқа ешкімде жоқ бұйымға айналдыруға болады. Жылдар бойы махаббатыңыздың нышаны болып сақталар сый. 

Әрбір отбасында орны бөлек әрі естелікке толы шырша ойыншықтары коллекциясы бар. Бұл коллекцияны жыл сайын жаңа әшекейлермен толықтырып, кезекті мерекелік хикая құруға болады. Мысалы, HAY House Copenhagen ұсынған лимон пішіндес ойыншық Италияға сапарыңызды еске салар таңғажайып естелік болары анық. HAY коллекциясынан бір ғана зат таңдау оңайға соқпайды, себебі түрлі әлем дәстүрлерінен шабыт алған дизайнерлердің жұмысы көздің жауын алады. 

Ex Nihilo Chandigarh Express — екі әлемнің арасында өмір сүретін жандарға арналған, унисекс хош иіс. Елестетіп көріңізші, сіз Ле Корбюзье стиліндегі бетон ғимараттар мен ежелгі храмдар ерекше үйлесім тапқан болашақ Үндістандасыз. Парфюм әлемінің бүлікшісі Гаэль Монтероның бұл туындысы — жай ғана хош иіс емес, нағыз манифест. Алдымен сізді Чандигарх көшелеріндегі хош иісті шайдың алғашқы жұтымына ұқсас цитрус пен кардамон толқыны басады. Содан кейін ақгүл мен былғары иісі қараусыз қалған храмдағы жабайы кеште би билеп жүргендей әсерге бөлейді. Ақырында пачули мен ветивер тұман түзіп, қоршаған орта Далидің картиналарындағыдай сюрреализмге айналғандай болады. Chandigarh Express — шектеулерге сыймайтын және тәуекелден қорықпайтын жандарға арналған мінсіз сыйлық.