Hublot Big Bang MECA-10

Ерекше механизмдік құрылымы бар бұл модель алғаш рет 2016 жылы таныстырылған. Он жылдан кейін Hublot MECA-10 моделін жаңартылған калибрмен, ықшамдалған 42 мм корпуста қайта ұсынды. Сағат King Gold, титан және металл жылтырынсыз кейіптегі көміртек материалдарынан жасалған. Бұл жолы дәстүрлі циферблат алынып, оның орнына бұрын жасырын болған механизмдік элементтер айқын көрінетіндей үлгі орнатылды. Ашық, үйлесімді дизайны классикалық құрылымын сақтап, жаңа әрі сәндік элементтермен толықтырылды. 

Бұл сағаттың қуаты 10 күнге жетеді. Энергия деңгейі цифрлық индикаторда көрсетіледі. Мұндай дәлдікке механикалық сағаттарда сирек кездесетін rémaillère редуктор жүйесі жауап береді. Қолмен бұрау жүйесі қуат резерві көрсеткіші мен серіппелі барабанның керілу деңгейінің дәл синхрондалуын қамтамасыз етеді. Парамагнитті кремнийден жасалған анкерлі дөңгелек қосымша майлауды қажет етіп, иесін әурелемейді. Ал уақытты дәл баптағыңыз келгенде, жай ғана секунд тілін тоқтататын механизмді қолдансаңыз болды. Бәрі жап-жаңа, тұп-тура қалыпта қайта «тықылдай» жөнеледі.

Louis Vuitton Tambour Taiko Spin Time

Spin Time – Louis Vuitton-ның аңызға айналған моделі. Оның алғашқы нұсқасы 2009 жылы жарық көрген. Ал су жаңа Tambour Taiko Spin Time болса, оның жаңартылған нұсқасы ретінде көпшілікке ұсынылды. Spin Time Air жүйесі әуежайдағы кесте тақталарына ұқсатып жасалған. Топтамадағы модельдер саны алтау ғана және барлығы LFT ST13.01 автоматты механизмінде жұмыс істейді. Бұл калибр La Fabrique du Temps Louis Vuitton шеберханасында арнайы жасалған. Механизм 18 караттық ақ алтын корпусқа орнатылған. Радиалды өңдеуден өткен циферблаттың сұр түсті реңкі ерекше талғамнан хабар беріп тұрғандай. Ұсынылған өлшем екі нұсқада болмақ: 39,5 мм және 42,5 мм. Кіші модельдің артқы қақпақшасы жабық, ал үлкенінде мөлдір қақпақ арқылы механизмнің жұмысын қызықтауға болады.

TAG Heuer Formula 1 Chronograph

Heuer автоспортқа тікелей байланысы бар алғашқы сағат бренді ретінде танымал. 1986 жылы жарық көрген TAG Heuer Formula 1 коллекциясы – бренд пен автоспорт арасындағы ұзақ мерзімді байланыстың айғағы. LVMH Watch Week 2025 көрмесінде төрт жаңа хронограф моделі және Oracle Red Bull Racing командасына арналған арнайы нұсқа таныстырылды. Сағат корпусы жеңіл титаннан жасалған, ал оның дизайны Формула-1 болидтерінің күрделі геометриясына негізделген. Аса ұсақ өлшемде тесілген безель мен қара алмаз тәрізді көміртекті жабын жылдам автокөліктердің тежегіш дискілерін еске түсіреді. Сол безельге тахиметрлік шкаласы бар алюминийлік сақина орнатылған.

Jean Schlumberger by Tiffany Bird on a Rock

Бұл бұйымның бойынан Tiffany & Co. тарихындағы ең жарқын дизайнерлердің бірі Жан Шлюмберженің қолтаңбасын аңғарасыз. Оның аты аңызға айналған Bird on a Rock атты әшекейі дәл осы сағаттың басты көзіріне айналып отыр. Бұл жолы гауһар таспен көмкерілген құс сағаттың циферблатына «қонған». Сыртқы сақинаға бекітілген қанатты әшекей білектің қозғалысымен бірге айналып тұрады. Сары какаду бейнесінен шабыт алған құс алтыннан, гауһар тас пен қызғылт сапфирден жасалған. Оның әр данасы үшін 24 сағаттан аса уақыт жұмсалған деседі. 

Бір қызығы, LVMH Watch Week 2025 аясында Bird on a Rock моделінің екі нұсқасы ұсынылды. Оның бірі – Bird on a Rock Full Pavé Diamond. 36 мм корпусы мен білезігі ақ алтыннан құйылған. Шеңберлі формада дайындалған 1318 гауһар тасы тағы бар. Онысының өзі сегіз каратқа жуықтайды. Ал циферблаттың ортасы қар инкрустациясы техникасында орындалған. Бұл әдіс әртүрлі өлшемдегі гауһар тастарды металдың минималды көрінуімен ерекше жарқырау әсерін беру үшін орналастыруды білдіреді. Сыртқы сақинасына 30 багет пішінді аквамарин орнатылған. Артқы қақпағына Floral Arrows түйреуішін еске түсіретін күн сәулесі формасы қашалған.

Zenith Chronomaster Sport Rainbow

Zenith-тің флагмандық хронографы жоғары дәлдіктегі сағат үлгісі ретінде көптің қызығушылығын тудырған. Бұл сағат 18 караттық ақ алтыннан жасалған. 41 мм корпусы радиустық сапфирлер мен он багет қырлы гауһар таспен көмкерілген безельмен ерекшеленеді. Лакталған қара циферблат кемпірқосақ түстес сағат белгілерімен және үш түрлі-түсті шағын есептегіштермен безендірілген. Super-LumiNova қаптамасы қараңғыда да көрсеткіштердің анықтығын қамтамасыз етеді. Ал El Primero 3600 механизмі 1/10 секунд дәлдіктегі хронограф функциясымен жабдықталған.