Заманауи Қазақстанның сән индустриясы тарих толқындарында түрлі кезеңдерден өтіп, өзіндік бірегейлікті қалыптастырғаны талғамы жоғары оқырманға бесенеден белгілі. Алғашында елімізде сәл кенделеу қалған сала болып қабылданғанмен, өткен ғасырдың соңында бұрқ етіп қаулап өсіп, жаңа есімдерді жұрт назарына ұсынған еді. Көзі қарақтылардың бәрі Kazakhstan Fashion Week-ті сән әлемінің Темірқазығы етіп санайтын. Нарықтың да бағдары соған қарап айқындалғаны ешкімге құпия емес. Алайда одан кейінгі алапат қарқын 2014 жылы KFW-ке баламалы түрде ашылған Mercedes-Benz Fashion Week Almaty сән апталығымен нарыққа дүрсе қоя берді. MFWA тартылыс күші аса жоғары жаңа жұлдыз іспетті айналасына халықаралық деңгейдегі журналистер, редакторлар мен дизайнерлерді жинады. Ал қазіргі таңда үшінші бір сілкініс анықтала бастағандай. Ұлттық бірегейлік пен «өзіміздікі» деген ұғым құнды бола түскен заманда сұраныс та сол бағытқа қарай артып барады. Мұндайда Қазақстан дизайнерлерін «Қазақстанға тән стиль қандай болу керек?» деген сауал мазаласа керек. 

Тамырын елімізде жайған кез келген брендтің даму жолы өзінше бөлек һәм бірегей. Бір тарап көшпелі өркениеттің ізін жалғап, қарапайым әрі қолданысқа жайлы дүниені шығармашылығының негізі етеді. Шабытты табиғат көріністері мен бояуларынан алып, сан ғасырлық тарихымызбен сабақтайды. Ал енді бір жақ азиялық моданың элементтері бар нәзіктікті, шығысқа тән сұлулықты басты бағыты еткен. Бұлардың арасында, әрине, батыс трендтерінен қалмай, жаһандық сән толқынында жайқала түскен дизайнерлер тобы да бар.

Осылай буырқанып, қайнап жатқан салада қазақстандық брендтер де өзінің қолтаңбасын қалыптастырып, қоғам мен сана қатпарларындағы өзгерістерді ашық көрсетіп келеді. Олардың батыл эксперименттері, көне мен жаңа арасындағы тепе-теңдікті іздеуі ел ішінде ғана емес, шекара мен мұхит асып, ғалам жұртшылығын өзіне қаратып отыр. Соның арасынан «мен, мен» деген мықтыларын өздеріңізге ұсынамыз.