Наурыз айына таман Алматы көшелерінен көктемнің нәзік лебі анық сезіле бастайды. Қақаған қысты артқа тастап, қалың тонымызды шешіп, иығымызға жеңіл де сәнді шапан жабатын кез келді. Бөрік орнына шекелік, шәлі орнына алқа сияқты әсем әшекейлерді тағып, жаңа маусымға жарқырап кіру үшін біз сізге Алматыдағы ерекше шапан мен әшекей дүкендерінің таңдаулы тізімін ұсынамыз.

Alkum.brand 

Иван Ургантқа шапан жапқан қазақ бренді бар екенін естісеңіз, таң қалмаңыз! Әңгіме Alkum.brand жайлы. Минималистік стильдегі ақ, қоңыр, қара реңкті жұмсақ түсті шапандар қазақы ою-өрнектермен безендірілген. Ерекшелігі сол, шапандар мен пиджактар унисекс, яғни әйел де, еркек те киіп, кез келген ортада ерекше стилімен көзге түсе алады. Қонақтыққа да, жай серуендерге де үйлесе кететін шапандар – дәстүр мен заманауилықтың мінсіз үйлесімі.