Зарина Шарифова «Чертаново» ӘФК-ның ортадағы жартылай қорғаушысы

Бірде әжем екеуміз резеңке доп тауып алдық. Оны күн-түн демей диванға теуіп ойнадым. Хикаям сол сәттен басталған болар. Футбол ойнау үшін халық биі үйірмесінен бас тартуға тура келді, қарсылық пен күмәнмен күрестім. Ойын өмірімнің басты бөлшегіне айналды. Жарақат қандай болса да, футболшы міндетті түрде алаңға оралады. Бізде ес жоқ қой! Екі рет ауыр жарақат алдым. Оңалу ұзақ әрі қиын болды. Өз-өзіме күмәнданған кездер де болды. Бірақ бойымнан күш тауып, қайта оралдым. Нағыз спортшыны бәсекелестік, қиындық және жеңіліс шыңдайды. Алған жарақатымның арқасында ойынға деген көзқарасым да біршама өзгерді. Алаңда болуды бақыт деп білемін, өйткені мен өзімнің сүйікті ісіммен айналысып жүрмін.

Эльвира Тодуа ЦСКА «Мәскеу» ӘФК-ның қақпашысы

Бала күнімде ұлдармен аулада футбол ойнайтынмын. Ағам менің доптан қорықпайтынымды, барынша секіріп, оны ұстауға тырысатынымды байқап, қақпаға тұрғызды. Жарақат көп болды. Кәсіби спорттың ажырамас бөлігі деп ойлаймын. Мысалы, тіземе үш рет ота жасалды. Оңалу қиынға соқты. Алайда алаңға қуана-қуана ораламын.  Қатты сағынып, зарыға күткен біреумен қауышқанға ұқсас сезім.

Анна Беломытцева «Локомотив» ӘФК-ның ортадағы қорғаушысы

Бала кезімде әжемнен ауладағы балалар менімен футбол ойнайтындай етіп беруді сұрайтынмын. Өзім нәзік болсам да, мінезім қайсар. Тізе жарақаты мен үшін бір үлкен сынақ болды. Екінші отадан кейін алаңға қайта оралуды қатты күттім. Оңалумен өткен айлар бітпей кетті. Бұл қиындықты қолдау көрсеткен жақындарым мен алаңға қайта шығуға деген ұмтылысымның арқасында еңсердім.

Карина Бакланова «Спартак» ӘФК-ның қорғаушысы

Тоғыз жасымнан бастап ойнаймын. Футбол – алғашқы шынайы махаббатым. Жарақат та, тығырыққа тірелгендей көрінген жағдайлар да болды. Жарақатқа дайын болу мүмкін емес. Ол сені сүйікті ісіңнен суырып алады. Қанша күтетінің де белгісіз. Денсаулықты күтіп, дененің беретін белгілеріне құлақ аса білу маңызды. Ойыннан бірнеше айға шығып қалғаннан гөрі үш күн оңалған артық. Өз басым осы ақиқатты білмей, тізе артрозына шалдықтым. Ота жасауға келмейді. Оңалудың бірден-бір жолы – бұлшық етті жаттықтыру. Маған ісіме деген сүйіспеншілік пен жеңіске деген ұмтылыс күш берді. Мен жеңіске жетіп, чемпион болып, гол соққым келеді. Алаңға шығып, көздегеніме жеткім келеді.