Алматының ерекше үш этно-спа мекенін аралап, шынайы демалыстың жаңа деңгейін сезініңіз!
Этно-спа әлеміне сүңгіп, жай ғана демалыс емес, уақыт пен кеңістіктен тыс, терең сезімдерге толы саяхатқа аттаныңыз. Бұл мақалада ұлттық дәстүрлер мен заманауи релаксацияның үйлесімін ұсынатын Алматының үш ерекше этно-спа мекені туралы айтып өтеміз. Қазақ мәдениетінің бай мұрасына негізделген бұл орындар сізге жан мен тәннің үйлесімдігін сезініп, толық қайта жаңаруға мүмкіндік береді.
Ethno Spa Sop
Ethno Spa Sop – ұлттық мұраның заманауи реңкте қайта жанданған мекені. Мұнда қадам басқаннан-ақ, сізді Мими Ильницкая мен Әсел Кенженің туындылары, Ләйлә Жарқынның киізден жасалған әсем кілемдері және жергілікті қызыл саздан жасалған қабырғалары қарсы алады. Интерьердегі ұлттық нақыштар мен петроглифтер мекеннің көркін арттырады. Барлық өнімдер қазақстандық өндірушілерден алынған, ал Жетісу өңірінде арнайы өсірілген шөптер рәсімдердің бірегейлігін толықтырады.
Айрықша рәсім: «Жаңару»
Бұл рәсім тандыр пішініндегі қызыл сазбен қапталған бөлмеде басталады. Лаванда мен жалбыздың нәзік хош иісі бөлмені баурап, денеңізді тыныштандырады. Қонақтарға варган аспабында және тибеттік тостағанмен орындалатын музыкалық сүйемелдеу ұсынылады. Соңында сізді әткеншек тәрізді сәкіге жатқызып, жылы көрпеге орап, толық релаксацияға жете аласыз. Сонымен қатар, мұнда сіз саумал массажының ерекше емдік әсерін де көре аласыз.
Sadu Ethno Spa Sop
1 / 5
Oi Qaragai Ethno Spa Umai
Қарлы тау бөктерінде орналасқан Oi Qaragai Ethno Spa Umai – табиғатпен үндесуді қалайтындар үшін таптырмас орын. Мұнда серуендеп немесе шаңғы теуіп болған соң, ерекше этно-рәсімдер шаршауды басуға көмектеседі. Киіз үйлердегі рәсімдер табиғаттың төрт стихиясын қамтиды: су, от, жер және ауа.
Айрықша рәсім: От терапиясы
Қыстың суығында ең танымал рәсім – от терапиясы. Қазақ халқы ежелден отты тазартушы және қорғаушы күш ретінде көріп, отпен аластау рәсімін қолданған. Бұл көне дәстүр бүгінгі күнге дейін өз мәнін жоғалтқан жоқ.
Рәсім табиғат аясындағы ыстық джакузиден басталады. Жан-жағыңызды жалбыз, бөріқарақат пен жұпаргүлдің хош иісі баурап, денеңізді тынықтырады. Джакузиден кейін киіз үйдегі кішігірім хамамда жылынуға болады. Кейін денеңізді скрабпен тазалап, от терапиясы арқылы денеңізді жылытып, аураңызды тазалайды. Атмосфераны Асылбек Еңсеповтың күйлері жандандырады, ал рәсімнен кейін Ой Қарағайда өсірілген шөптерден дайындалған шайға марқайып қаласыз.
