Исаак Палеонның мың түрлі әдісі

Лондондық шаш стилисі Исаак Палеон өз мансабын 17 жасында кездейсоқ бастап кетті деуге болады: «Сол кезде бірге тұрған әйел мені өз шаштаразымен таныстырды. Жаңа мүмкіндіктерге ашық едім, ақша да керек болды». Аз ғана уақыт өткен соң, Исаак Лондонда 90-шы жылдардан бері танымал, беделді, қара нәсілді жандарға арналған салонда жұмыс істей бастады.

Палеонның мансабындағы ең бір жарқын сәттердің бірі Рианнамен бірге істеген жұмысы болды: «Рианнаның алғашқы Cameo Collection зергерлік коллекциясына арналған Fenty науқанымен айналыстым. Осыдан жарты жыл бұрын ғана ASOS-та еңбек еткенім туралы ойласам, мұның ғажап тәжірибе болғанын түсінемін. Кенет Рианнаға шашты қалай алу керектігін көрсету мүмкіндігіне ие болдым».

Бүгінде портфолиосында Fenti, Calvin Klein және Valentino брендтеріне арнап жасаған еңбектері, сондай-ақ British Vogue және AnOther Magazine журналдарының түсірілімдері бар. Жүзеге асырған жобаларына қарамастан, Исаак өзінің мансаптық жолы енді ғана басталғанын айтады.

Мүсіндік бұрым, мінсіз сәнделген афро, толқын секілді еңбектері мың түрлі әдісті қолдана отырып жасалған. Палеонның шығармашылық жоспары көп. Стилист Мэрайя Кэри, Джанет Джексон, Мэри Джей Блайдж сынды аты аңызға айналған әртістермен жұмыс істеп көруді армандайды екен: «Олардың классикалық стилі менің эстетикама сай келеді: әдемі, «жылтыраған» шаш үлгілерін жасағанды ұнатамын. Осы арманым орындалса, ғажап болар еді».

Цукидің мүсіндік шаш үлгілері

Жапондық шаш стилисі Цуки қазір Нью-Йорк қаласында жұмыс істейді. Ауылдық жерде орналасқан, кішігірім, бірде-бір сұлулық салоны жоқ Сайтама қаласында дүниеге келген Цуки өзінің де, достарының да шашын ала отырып, осы өнерді игерген екен. Дәл осы мансапты таңдауына Beautiful Life сериалындағы жас шаштараз болып ойнаған бас кейіпкер түрткі болған.

Нью-Йорк қаласына көшерге дейін Цуки тоғыз жыл бойы Жапониядағы салонда жапондық шаш типімен жұмыс істеген болатын. АҚШ-қа келгеннен кейін шеберге басқа шаш типін қиюды үйренуге тура келді. Нью-Йоркте стилист-фрилансер болып жүрген Цуки аз ғана уақыт ішінде табысқа жетіп, Vogue US және T Magazine сынды журналдардың эдиториалдарына үлес қоса бастады. Сондай-ақ Цуки Thom Browne және Phillip Lim брендтерімен серіктестік құрып үлгерді. 2024 жылдың қаңтарында Цуки Нью-Йоркте сүйген жары әрі шаш стилисі Рицуко Хотакамен бірге On-Session салонын ашты: «Нью-Йорктегі салондар не тым салтанатты, не тым қарапайым. Токиодағы салондарда азын-аулақ тепе-теңдік бар. Сол стиль мен жайлылықты осында әкеліп, салон ашайық деп шештік».

Цуки бірегейлігі мен айқындығымен ерекшеленетін мүсіндік шаш үлгілерін жасайды. Сонымен қатар шебер текстура, пішін және шаш үлгісі мен макияж, киім стилі арасындағы жалпы гармония сынды детальдерге көп көңіл бөледі.

Джои Джордждың шығармашылық әдісі

Шаш стилисі әрі суретші Джои Джордж — өз саласының жаңашылы. Еңбектерінде техникалық дағдылар мен шығармашылық әдіс астасып жатады. Джордж заманауи өнерден шабыт алып, ерекше әрі провокациялық образдар жинайды.

Джои бала кезінен өнерге жақын болды. Төрт жасынан бастап 17-ге толғанша балетпен айналысқан шебердің бойында мінезбен қоса артистизм қалыптасады. 2006 жылы Джои Нью-Йоркке көшіп, Соходағы Aveda Институтын бітіреді. Оқуын аяқтаған соң, ол шашты сәндеуге қатысты эксперимент жасап, кәсібін нағыз өнерге айналдырды.

Мансабын Vogue, Elle және Harper's Bazaar сән журналдарының стилисі болып бастаған Джоидің бойындағы дарыны көп ұзамай сән және шоу-бизнес саласы өкілдерінің көзіне түсе бастады. Леди Гаганың The Artpop Ball Tour-на арнап парик әзірлеп, Givenchy, Tom Ford, Azzedine Alaïa және Zara брендтерімен бірге жұмыс істеді. Сондай-ақ Джои тәлімгерлікпен айналысып, Oribe Haircare компаниясына арнап өнім жасап шығарған.

Джои күрделі әрі көп өлшемді шаш үлгілерін дайындап, дәстүрлі деуге келмейтін әдістерді қолданады. Шашты адам болмысын айқындайтын құрал санайтын ол өз жұмыстарында шаштараздық міндетпен ғана  шектелмейді: «Шашты адамның бет-әлпетінің бір бөлігі деп қана емес, оның даралығын айқындау жолы деп білемін. Шаш адамның мінезін, өз-өзіне деген сенімділігін және стилін көрсете алады деп сенемін».