Tatler Kazakhstan ашылуына орай өткен салтанатты шараның айшықты сәттері мен мәртебелі меймандары жайлы оқи отырыңыз!
Абай атындағы Қазақ ұлттық опера және балет театрында Tatler Kazakhstan журналының ашылуына орай арнайы кеш өтті. Бұл шарада қазақстандық кәсіпкерлер қауымдастығының өкілдері, медиа саласының мамандары, инфлюенсерлер мен шетелдік қонақтар бас қосты.
Меймандар босағадан аттай сала, сәні мен дәмі жарасқан тағамдардан ауыз тиіп, диджей Эльдар Хакимовтің музыкалық бағдарламасына куә болды. Ал кешкі ас кезінде нидерландық әнші Kovacs-тың орындауындағы соул шығармалары өнер ордасын ән қанатында тербеп әкетті.
Қонақтарды қарсы алу рәсімінен кейін негізгі шара театрдың үлкен залында өтті. Мұнда көрермендерге Tatler журналының тарихы мен философиясына арналған қойылым ұсынылды. Көзі қарақты көрермен классикалық театр, заманауи хореография және мультимедиялық проекция элементтерінің айрықша үйлесімін қызықтады.
1 / 2
Бағдарлама барысында Tatler Kazakhstan журналының Бақылаушылар кеңесінің төрағасы Тимур Турлов, Tatler Asia компаниясының бас директоры Мишель Ламуньер және бас редактор Жамиля Әбілова сөз сөйледі. Олар Tatler журналының Қазақстанда шығуының маңыздылығына тоқталды. Басылым Шығыс пен Батыс арасындағы диалог алаңы болатынына үміт білдірді.
«Әлемге әйгілі Tatler-дің бренд картасындағы жаңа нүкте Қазақстан болып отыр. Біздің ел Орталық Азия мен түркі әлемі қауымдастығының көшбасшысы атанып келеді. Менің ойымша, Қазақстан талант пен шығармашылық әлеуеті мол ел ретінде жаңа стандарттарды белгілеп, оларды дамытуға қауқарлы. Әрі әлемді сұлулық пен талғампаздықтың жоғары деңгейімен таң қалдыруға мол мүмкіндігі бар. Бір сөзбен айтқанда “трендтердің Темірқазығы” болуға шамамыз әбден жетеді».
– Тимур Турлов
