«Достық құруға арналған Tinder»

«Frienda-да халықаралық әлеует о бастан бар. Орыс тілді қоғамдастықтан бастадық», – деп түсіндіреді Малика. Бала кезінен адамдармен оңай тіл табысып, оларға дос, ортақ қызығушылық табуға көмектесіп келген Маликаға әлеуметтік желілерде «Мұнша досты қайдан таптың?» деген сияқты сұрақтар жиі келіп түсіпті. Бұл сұрақтың жауабы: «Дос тапқың келсе, белсенді болып, түрлі кеш ұйымдастырып, адамдарды бір-бірімен таныстыру керек», – дейді Малика.

Frienda-ның бастапқы концепциясы өзгеше болыпты. Әйелдерге өзін-өзі дамытуға мүмкіндік беретін, жазылым негізіндегі клуб болу керек еді. Аудиториямыздың 99%-ы әйелдер екені анықталғанда, концепция да пісіп-жетілді: Frienda – жай ғана «достарға арналған Tinder» емес, бұл – әйелдер арасында нағыз достық құруға арналған платформа.

Ерекше динамика 

«Ерлер мен әйелдер арасындағы достықтың айырмашылықтарын зерттей бастадық, жаңа зеландиялық ғалым Стейси Симс спорттағы әйел денсаулығы туралы былай дейді: «Әйел кішкентай ер емес» (ғылыми зерттеулердің көбі ерлерге жасалып, әйелдердің физиологиялық ерекшеліктерін қарастырмайды – Tatler). Әйелдер арасындағы достық өзінше бір ережелерге сай құрылады. Бұл – эмоция мен қолдауға толы достық. Алайда достық әдетте балалы болу не қоныс аудару сынды өмірлік өзгерістерге тәуелді. Сондықтан біз Frienda-ны осындай мәселелерге баса назар аудара отырып, әрбір әйел жанына жақын, мейлі, уақытша болсын, мейлі, өмірлік болсын, әйтеуір құрбы таба алатындай қылып әзірледік», – дейді Малика. Ерлер досты беделіне қарай таңдаса, әйелдер адамның вайбына, жанына көңіл бөледі. Әйелдер үшін эмоциялық байланыс пен әңгіме құру мүмкіндігі аса маңызды.

Мамалар мен апалардың достығы

Frienda жас аудиториямен шектелмейді. «Келесі жасайтын қадамымыз – мамалар мен апаларға да құрбы табуға көмектесу», – дейді Малика. Жалғыздық індеті әсіресе ересек адамдарды есеңгіретеді. Әйелдер уақыт өте келе тілдесетін адамдары азайғанын байқап жатады. Эмиграцияға да, үлкен қалаларға да қатысты мәселе. Frienda-ға келген әрбір бойжеткен мұнда мамасын шақырып, оған құрбы табу мүмкіндігін сыйлай алады.

Достық әртүрлі болады. Маусымдық, қайсыбір өмір сатысында кездесетін құрбылар да, өмір бойы алыстамайтын құрбылар да болады. Мысалы, бала туғанда өмір салты өзгереді, жас аналармен сөйлескің келеді. Жаңадан тұрмыс құрған әйелдің де қажеттіліктері басқаша болады. Frienda мұның бәрін ескеріп, адамдарды жасына қарап не кездейсоқ іздемей, оларды лайфстайлына қарай іріктейді.

«Бұл процестердің бәрін ой елегінен өткіздік. Деректерді адамдар заң аясында, әдепке сай әрі мәнді байланыс құра алатындай етіп жинау маңызды. Эмодзиді отбасы жағдайы, балалардың болуы не болмауы, қызығушылықтар және құндылықтар жөніндегі нюанстарды айқындау үшін қолданамыз. Бір ғана символ ұзақ сауалнамадан гөрі көбірек ақпарат бере алады. Қолданушыларымыз: «Таңдаған эмодзиін көрдім де, бәрін түсіндім», – дейді. Кездескенде бір-бірінің дос болуға лайық адам екенін бірден ұғады», – деп түсіндіреді Малика.

Mini-app

Frienda – жай ғана Telegram-дағы mini-app емес, бұл – заманауи технологиялардың негізінде құрылған, әбден ойластырылған қызмет. Telegram-ды да кездейсоқ таңдай салған жоқпыз. Оған жаңа әрі әлеуетті, пайдалы функционалды үйреншікті тілдесу ортасына енгізуге мүмкіндік беретін формат деп жүгіндік.

«Қытайда WeChat баяғыда-ақ толыққанды экожүйеге айналды. Онда адамдар сауда жасап, қызмет брондап, кәсіппен айналысады. Telegram-ның жолы да сол, ал Frienda – осы форматтағы алғашқы әлеуметтік қызметтердің бірі. Telegram-ды құрбыңызбен сөйлесу не жаңалық оқу үшін ашасыз да, Frienda-дан келген хабарламаны көресіз. Бейнебір өмір заңдылығы іспетті, қосымшаны жүктеудің қажеті жоқ. Алайда біз мұнымен тоқтамаймыз. Болашақта iOS пен Android-қа арналған Frienda қосымшасы да шығады. Telegram аса танымал емес елдердегі қыздар да құрбы тапсын дейміз», – дейді Малика.

Жеке тәжірибе

Редакторымыз Адиса Кин қосымшаны қолданып көрді. Frienda жалқаулардың да көңілінен шығары сөзсіз.

Біріншіден, қосымшаны жүктеудің қажеті жоқ. Telegram-ға ыңғайлы интеграцияланған Frienda-ны бірнеше кликтен кейін-ақ қолдана беруге болады. Екіншіден, тіркелуге бір минутқа жетер-жетпес уақыт кетеді. Үш сұраққа жауап беріп, қызығушылықтарыңызды айқындайтын 10 эмодзи (қосымша бұларды автоматты түрде ұсынады) таңдау керек. 15 минутта тіркеліп, ертеңінде бір бойжеткенмен кездесетін болдым. Ол да мен сияқты Габор Матенің жанкүйері екен.