IKEA әлем бойынша ұйқының бұзылуы жөнінде сауалнама жүргізіп, қарабайыр кеңес берді.
Адам өмірінің үштен бір бөлігі ұйқыда өтеді. Ұйқы бұзылғаннан денсаулық орасан зиян шегеді, әлсіздік пен алаңғасарлық пайда болады. Салдарынан адамның жұмыс істеу қабілеті бәсеңсіп, тиімділігі азаяды. Мұның барлығы ақыры соңында әлемдік экономиканың құлдырауына әкеп соғады. IKEA компаниясы ұйқы мәселесі мен оған қатысты әдет тақырыптарына тереңірек бойламақ болып, клиенттері арасында әлемдік деңгейде сауалнама жүргізді. Сауалнамаға 55 221 адам қатысты. Қатысушылардың 70%-ы ұйқыны «рахаттың рахаты» депті. Сауалнамаға қатысқандар – негізінен студенттер, ата-аналар және түнде жұмыс істейтін азаматтар. Зерттеуге сенсек, жасы 65-тен асқандардың арасында ұйқыға деген құмарлық азая түседі.
Ұйқы жетіспеушілігі орташа есеппен бір сағат 20 минутты құрайды екен. Адамдар ұйқының қануына дәл осы уақыт мөлшері жетпейді депті. Ең үлкен, яғни екі сағаттық ұйқы дефициті Түркияда байқалатын көрінеді. Материктік Қытай тұрғындарының ұйқысы тұрақты әрі салыстырмалы түрде салауатты. «Ұйқы дегеніміз жай ғана тынығу емес», – дейді Уппсаль университетінің жүйке биологі Доктор Кристиан Бенедикт. Бенедикт «әлеуметтік джетлагқа», яғни демалыста ұйқы қанбау мәселесіне көңіл бөліп, бірқалыпты ұйқы кестесіне сәйкес өмір сүруге шақырады. Сондай-ақ зерттеуде ұйқы алдында телефон қолданбау, бөлменің ауасын тазарту, ұйқы кестесін сақтау сынды қарабайыр кеңес көп.
