Фитнес

Тұрақты түрде спортпен шұғылданатын адамдар аз ауырады, өйткені олардың иммундық жүйесі әртүрлі ауру қоздырғыштарымен тиімді күреседі. Онымен қоса бұл күйзеліске ұшырататын мәселелерден бой сергітудің де бір амалы іспетті. Тек ағзаға зиян келтірердей кері әсер болмауы үшін фитнеспен сауатты айналысу керек. Ал оған қосымша гаджеттер жақсы көмектесе алады. 

Супер қаһарман Тор образымен танылған Крис Хемсворт Centr деп аталатын өзінің фитнес және сауықтыру қолданбасын жасап шығарған еді. Атлеттерше мінсіз сырт келбетімен көпшілікті тәнті еткен актёр дұрыс тамақтанудан бастап, денені сканерлеу һәм өнімді жаттығу құпияларымен бөліседі. 

Ал «Терминатор» Арнольд Шварценеггер The Pump пайдалы әдеттер трекерін ұсынса, Криштиану Роналду биыл Erakulis сауықтандыру қосымшасын шығарды. «Жетістікке жетуіме зор ықпал еткен – бірнеше сағаттық жаттығулар, тамақтануға тиісті деңгейде көңіл бөлу және психикалық дайындыққа ден қою. Біз Erakulis-ті жасағанда, осының бәрін ескердік», – дейді футбол жұлдызы. 

Нутрициология

Netflix ұсынған «Live to 100: Secrets of the Blue Zones» фильмінде ұзақ жасаудың бір құпиясы ретінде саналы тамақтану сипатталады. Мысалы, жасыл аймаққа жататын жапондықтарда «hara hachi bu» деген түсінік бар, ол – тойғанша жемеу, асқазанды 80%-ға бос қалдыру өнері. Осы орайда порция көлемін өлшеу мен калорияны есептеуге арналған Zero мен MyFitnessPal сынды қолданбалардың маңызы зор. 

Сондай-ақ нутрициологиялық қосымшалардың жүкті әйелдерге, аллергиясы бар адамдарға немесе диеталық шектеулерді ескере отырып құрылған рациондар ұсынатын нұсқалары да көп-ақ.

Дұрыс тамақтануды өмір салтына айналдыруға көмектесетін девайстар қатарында Beko Vacuum Blender де бар. Ол жемістер мен көкөністерді езудің алдында ауаны шығару арқылы тотығу процесін тежеп, дәрумендердің сақталуын қамтамасыз етеді. No frost тоңазытқыштар өнімді мұз қылып қатырмай-ақ, балғындығын барынша ұзақ сақтауға бағытталған. 

Келбет

Кез келген адам қаншалықты ұзақ өмір сүргісі келсе, соншалықты жас әрі сұлу қалпын сақтап қалуды көздейді. Адамның бет-жүзінің әдемілігін арттыратын құрылғылар арасында NuFACE өнімдері танымал. Микротолқынды девайсты Миранда Керр, Кейт Хадсон сынды A-list жұлдыздар үй жағдайында бет күтімін жасау үшін қолданады. 

Инновациялық шешімдерге толы Foreo брендінің атақты Luna бет тазартқыш щёткасын Крисси Тейген, Виктория Бекхэм, Рита Ора, Эшли Грэм, Майли Сайрус пен өзге де атақты бикештер қолданады. Ол теріні кір мен майдан тиімді тазартып, макияжды кетірген кезде теріні зақымдамайтын T-Sonic пульсациясын пайдаланатынымен ерекшеленеді. 

L’Oréal бьюти-конгломератының шаш үлгісін таңдауды жеңілдетуге арналған Style My Hair қолданбасы сізге бет-әлпетіңізге қандай шаш үлгісі мен бояу реңі жарасатынын онлайн сынап көруге мүмкіндік береді.

Мұндай сырт келбет көркемдігін артыра түсетін құрылғылар мен қосымшалардың шеті мен шегі жоқ. 

Ұйқы

Шыны керек, қазіргідей даму қарқынына көз ілеспейтін заманда бір сәт аялдап, демалуға уақыт табудың өзі қиын. Ал толыққанды ұйқы мен оның әр фазасына тиісті деңгейде мән беріп, ден қою қажет екені бесенеден белгілі. Салауатты өмір салтын ұстануға бел буған адам ағзаның тынығуына көп көңіл бөлуі керек. Жеме-жемге келгенде, жасаған жаттығуыңыздың нәтижесі де, тұтынған органикалық асыңыздың сіңуі де осыған байланысты. 

Ұйқының сапалы болуына көмектесетін Calm қосымшасы жұлдыздар мен инфлюенсерлер арқылы өте танымал қолданбаға айналып үлгерді. Жүктеп алсаңыз, ұйықтар алдында Лора Дерннен бастап, Гарри Стайлсқа дейінгі кумирлеріңіздің Sleep Stories әңгімелерін тыңдап жатып ұйықтап кетесіз.

Ұйқыны реттеуге көмектесетін тағы бір дүние туралы Дженнифер Энистон 2021 жылы Jimmy Kimmel Live шоуына барғанда айтып берген еді. Оның саусағында Oura Ring зергерлік бұйымы жүрек соғу жиілігі сынды биосигналдарды бақылап, ұйқы сапасын анықтай алады. Бұл сақинаны тағатындар қатарында София Ричи, Ким Кардашьян, Гарри ханзада сияқты өзге де танымал тұлғалар бар. 

Саналылық

Жоғарыда аталғанның бәрі тәннің саулығы мен сұлулығына бағытталса, соңғы пункт сана мен ойды реттейді. Осы бағытта Mindfulness apps атауымен белгілі. Мұны «Ми фитнесі» деуге де болады, яғни миды тыныштандыру арқылы ішкі жай-күйіңді ретке келтіру. Маза бермейтін ойларды басқара отырып, жан рахатын сезіну.

Қосымшалар ішінен кең қолданыс тапқаны Headspace шығар. Оған Джессика Альба, Джаред Лето, Джефф Вайнер сияқты атақтылардың инвестор болуы себеп. Веб-сервис пен мобильді қосымша күйзелістен құтылу жолдарын, түрлі медитациялар, ұйқы сапасын арттыру әдістерін ұсынады. Джон Леджендпен бірге адамға музыканың қалайша үйлесімділік сыйлайтынын сезініп көру мүмкіндігі бар. 

Breathwork қосымшасы дұрыс тыныстау арқылы гармонияға жетуге көмектеседі. Адам туғаннан үздіксіз демалады, оны үйренудің не қажеті бар десеңіз, қателесесіз. Мұндай қолданбаларға бей-жай қараудың қажеті жоқ. 

Жазушы, ақын әрі тарихшы Диана Аккерман өзінің атақты A Natural History of the Senses атты кітабында: «Көзіңізді жұмсаңыз, бір мезет көрмей қаласыз. Құлағыңызды жапсаңыз, сол сәтте-ақ кереңге айналғандай күй кешесіз. Ал демалмай көріңізші. Тыныс ала алмау өліммен тең», – дейді. 

Мына ғажап өмірдің әр сәтін біз сезім мүшелері арқылы қабылдайтын болсақ, тері – осы функцияны атқаратын ең үлкен орган. Адам алдымен өз-өзін, сонан соң барша әлемді терісі арқылы сезініп таниды. Тактильді қабілет жаңа туған балада да болады. Ал технология дамыған заманда ғалымдар оның электрон баламасын ұсынып отыр. 

Электр өткізгіштігі мен жылу сезімталдығы жоғары гидрогельдердің жаңа түрлері ойлап табылып жатыр. Солардың арқасында жоғарыда аталған гаджеттер мен қолданбалардың әсерін арттырып, кейде тіпті орнын басуға бар. Демек, электрон тері денсаулық, фитнес, нутрициология, келбет, ұйқы мен саналылықтың, сәйкесінше жан мен тән саулығы бойынша кемел келешекке жетелер құралға айнала алады.