Бұл мақалада сізге жыл қорытындысын жасаудың бірнеше тәсілін ұсынамыз
Күнделікті күйбең тірлікке батып, өткен жылымызды көз алдымызға елестетіп, өзімізге әділ баға беру қиын. Әсіресе, Instagram әлемінде өзгелердің әдемі сәттеріне қарап, өз өмірімізге көңіліміз толмауы ықтимал. Алайда әрқайсымыз, тасбақа қадамымен болса да, армандарымызға қарай баяу қадам басып келеміз. Психологтардың айтуынша, өткен жылды ой елегінен өткізіп, жасаған жетістіктерімізді бағалау – келесі жылға мақсат қоюға көмектеседі. Сізге жыл қорытындысын жасаудың бірнеше тәсілін ұсынамыз. Әр әдіс сіздің жетістіктеріңізді бағалап, жаңа жылда нені дамыту қажет екенін түсінуге көмектеседі.
Жылдың ең маңызды оқиғасы
Сұрақ: Биыл мен үшін ең маңызды оқиға не болды? Неліктен бұл оқиға менің өмірімде ерекше орын алады?
Өзіңіздің жыл ішіндегі ең маңызды сәтіңізді ойлап көріңіз. Бұл жаңа жұмыс, балаңыздың дүниеге келуі немесе өзіңіз туралы жаңа бір нәрсені ашу болуы мүмкін. Ең маңызды оқиға өткен жылға баға беруге көмектеседі және осыдан сабақ алу – келесі жылы мақсаттарыңызды нақтырақ қоюға жәрдемдеседі.
Momento қосымшасы: Әр сәтті еске алып, алдыңғы жазбаларыңызбен бөлісіп, маңызды оқиғаларды атап өтуге қолайлы қолданба.
Жетістіктер пай-чарты
Жетістіктеріңізді көзбен көру үшін шеңбер диаграммасын (пай-чарт) құрыңыз.
1. Бұл шеңберді сегізге бөліңіз;
2. Әр бөлікті өміріңіздің бір саласына арнаңыз: жұмыс, отбасы, жеке даму, денсаулық, достық, қаржы, демалыс немесе рухани даму.
3. Әр бөлікті 1-ден 10-ға дейінгі шкаламен белгілеңіз. Осындай диаграмма жасап, болашақта қандай салаларға көбірек көңіл бөлу керектігін анықтайсыз. Мысалы, жұмыста жетістіктерге жетсеңіз, бірақ денсаулығыңызға аз назар аударған болсаңыз, келесі жылы денсаулыққа көбірек назар аудару керектігін нақты көре аласыз.
GoalsOnTrack қосымшасы: Мақсаттарды салалар бойынша бөліп, қаншалықты толықтырғаныңызды бақылауға арналған қолданба.
Өткен жылға арналған хат жазыңыз
Сұрақ: Өткен жылы не нәрсеге ризамын? Не нәрсеге көңілім толмады? Қандай сәттерден сабақ алдым?
Қолға қалам алып, өзіңізге осы өткен жыл туралы хат жазыңыз. Неден бастаймын деп ойланбаңыз, тек ішкі сезіміңізді қағазға түсіріңіз. Кейбіреулер үшін бұл 2 бет қана болуы мүмкін, ал басқалар үшін 10 бетке созылуы ықтимал. Мұндай хат жазу – саналы және бейсаналы ойларыңызды шығаруға көмектеседі. Осылайша, өзіңіз туралы маңызды мәліметтер мен шынайы ниеттеріңізді түсінесіз.
Grid Diary қосымшасы: Жыл соңында өзіңізге хат жазуға арналған орындары бар, жазу процесін жеңілдететін қолданба.
Reflectly қосымшасы: Ойларыңызды жүйелеп жазуға көмектесетін жеке күнделік қолданбасы.
