Психолог Максим Исаковтан осы феномен туралы ой бөлісуді және ерлер арасындағы жалғыздықпен күресуге қатысты кеңес беруді сұрадық:
«Қазіргі қоғамды жиі атомизацияланған деп сипаттап жатады. Психикамыз вакуумда қалқыған зат емес қой, оған сырттан мәдени, технологиялық және экономикалық факторлар әсер етеді. Сондықтан ерлер арасындағы жалғыздық мәселесін талқыламас бұрын ортамыз адамдар арасындағы байланыстарды нығайтуды, басқалар үшін құрбандыққа не компромисске баруды қаншалықты қолдайтыны, бірлігіміздің маңызы қаншалықты атап өтілетіні туралы ойлану қажет. Қазіргі поп-психология «шекара сызу», яғни жеке мүдделерді қоғам мүдделерінен алшақ ұстау, адамдардың басқа шығып алуына жол бермеу туралы айтып жатады.
Ерлер жалғыздығы мәселесі қызық бір парадоксты айқындайды: ерлер нарықтың, рационалдықтың және индивидуализмнің патриархалды логикасының негізін қалаушы бола тұра, оның азабын өздері тартып жүр. Жеке тұлғаны бірінші орынға қою басқалармен жақын қарым-қатынас құруға кедергі келтіреді. Махаббат үшін құрбандыққа бару туралы айтып отырған жоқпын, барлық нәрсе, оның ішінді романтикалық қарым-қатынастар, тауарға айналған қоғамда қарым-қатынас қажеті жоқ бір рудимент болып қалады.
Әрине, тәрбиенің өз орны бар: мачизм логикасы бала кезден сіңген ерлердің көбісі осалдық пен сезімпаздықтан (оны әлсіздік деп біліп) қорқып өседі, сондай-ақ оны қарым-қатынас аясында толық тұлға болып қалыптасу критерийлері де қысады.
«Не істеуге болады?» сұрағына келсек, бір-біріне қайшы келетіндей көрінетін екі вариант ұсына аламын. Бір жағынан ерлердің қарым-қатынасқа ұтымдылық және пайда тұрғысынан қарағаны жақсы. Жақын қарым-қатынастарды керексіз деп білетін жандарға олар шын мәнінде қажет қолдау, күш және тыныштық көзі болуы мүмкін. Екіншіден, ерлер миына сіңген ережелер мен ойларға сыни көзбен қараса, жөн болар еді. Ер адам өз-өзіне «Мен шынымен де өз-өзімнен осынша нәрсе талап етемін бе?», «бұл ой менде қайдан пайда болды, оның маған пайдасы бар ма?», «бұл ойға төтеп беріп, тұлғамның толықтығына ақша мен жетістіктер тұрғысынан қарамауға бола ма?» деген сұрақтарды жиі қойып тұрғаны дұрыс. Адамның өз-өзіне сыни қарауы қиын болуы мүмкін, өйткені мұндай ой оны ұзақ уақыт бойы ұстап келе жатқан тіректі бұза бастайды. Алайда көп жағдайда «нағыз ер адам» туралы үйреншікті ойды бұзып қана жаңа ойға жетуге, қарым-қатынастардың шайқас алаңы емес, қолдау көзі екенін түсінуге болады.
