Йель университеті профессорларының зерттеулеріне сай, анда-санда шынайы бақытты баристадан іздеген жөн
Көзіңізді жұмып, бақыт туралы ойлаңызшы. Ойыңызға алдымен не келеді? Сән-салтанат, шексіз байлық па әлде күн сәулесіне малынған жағажайдағы сәнді вилла ма? 2010 жылы Принстон университетінде жүргізілген зерттеу бойынша, егер жылдық табысыңыз $75,000-ға (шамамен 40 миллион теңге) жетсе, одан артық ақшаның бақыт деңгейіне аса қатты әсер ете қоймайтынын анықтаған. Бірақ 2023 жылы бұл шек өзгеріп, жылына $90,000 (шамамен 47 миллион теңге) табыс бақытты болуға жеткілікті деп көрсетілген. Ғалымдар бұл сұрақтың жауабы әлдеқайда күрделі екенін айтады. Табыстың өмір сүру сапасын жақсартатыны сөзсіз, бірақ ол ұзақмерзімді шынайы бақыттың кілті емес. Біз Lumos Psychology мекемесінің психолог-консультантымен сөйлесіп, бақыттың неге қатысты екенін талқыладық.
Lumos Psychology мекемесінің әлеуметтік психологі Динара Түсіпқалиева:
«Табыс деңгейінің көрсеткіші ретінде материалдық жетістіктер адамның әлеуметтік иерархиядағы орнын жақсартып, бақыт сезімін арттыра алады. Демек, кімде-кім әлеуметтік-экономикалық жағдайын өзгерте алатынын білсе, олар бұдан ерекше қанағат табады. Ақша өмірдің күйзелісін азайтып, белгілі бір еркіндік берсе де, нағыз бақытқа бөлей алмайды. Ұзақ мерзімді әл-ауқат үшін материалдық байлыққа қарағанда, басқа факторлар маңыздырақ».
Сондай факторлардың бірі – әлеуметтік қарым-қатынастар. Осы орайда Йель университетінің профессоры Лори Сантостың зерттеулері ерекше маңызды. Оның айтуынша, бақытты болу үшін сәнді көлік немесе бренд киімдерден бұрын адамдармен қарым-қатынас маңыздырақ.
Лори Сантостың The Happiness Lab подкастында айтылғандай, таңертең кофеханада баристамен жылы сөйлесу, көршіңізбен аз да болса әңгіме-дүкен құру немесе кешке достарыңызбен кездесу сіздің бақыт деңгейіңізді арттырады. Әлеуметтік байланыстар – күнделікті күйбең тіршілікте байқалмайтын, бірақ бізге қуаныш сыйлайтын маңызды аспект.
