Амстердам, Польша, Чикаго және Лондонда орналасқан қазақ асханасынан дәм татуға болатын мейрамханалар жайлы оқи отырыңыз.
Жыраққа кеткенде әр адам өз Отанының асханасын аңсайды. Әсіресе қазақ тағамдарына үйренген қазақстандықтар үшін ұлттық асханадан алыстау қиынға соғатыны рас. Себебі кез келген жерде қазы-қартасы мол беcбармақ, ыстық бауырсақ пен қаймақ қосылған шай табыла бермесі анық. Біз шетелде орналасқан, қазақтың дәстүрлі тағамдарын ұсынатын үздік мейрамханаларды жинап, мақала жаздық.
Jurta
Мекенжайы: ul. Piramowicza 10, Łódź, Польша 90-254
Jurta – отбасылық шағын мейрамхана, Польшаның Лодзь қаласында орналасқан. Оны 2018 жылы Алматының тумасы Андрей Водопьянов ашқан. Шетелде жүріп, қазақ тағамдарына деген сағынышы осындай кәсіп бастауға итермелепті. Мейрамхананы ашу үшін екі жылдай уақыт қажет болған. Интерьердің көп бөлігі қолдан жасалған, ал ұлттық стильдегі жастықтардың маталары арнайы Қазақстаннан әкелінген. Jurta иелері жобаға жанын салып, жүрек жылуын сіңіргенін бірден байқайсыз. Ас үйдің бас аспазы – Андрейдің әкесі. Ол 1980 жылдары қазақ офицерлеріне тағам әзірлеген тәжірибелі маман. Jurta мейрамханасында сорпа, жылқы етінен жасалған беcбармақ, мәнті, бауырсақ және шығыс тәттілері секілді тағамдар ұсынылады.
Jurta | Instagram @jurta_restauracja
1 / 2
Qazaq Coffee
Мекенжайы: Zeilstraat 45-H, 1075SC, Амстердам
Алматылық Талғат Аубакиров 2022 жылы Амстердамға көшіп, 2023 жылдың маусым айында Qazaq Coffee спешиалти кофеханасын ашты. Бұл жер Амстердам үшін ерекше әрі сирек кездесетін тұжырымдамаға ие. Мұнда қазақ асханасы, қонақжайлығы мен дәстүрі үйлесім тапқан. Кофеханада қазақша шай, кардамон, қалампыр, зімбір және даршын қосылған тәтті шай, қоюландырылған сүт қосылған «жаңғақ» печеньесі мен вафель түтікшелері ұсынылады. Сондай-ақ мұнда QC House Blend арнайы кофесі сатылады, оны әзірлеуге Талғаттың достары көмектескен.
