Екінші күн

Тарихына терең бойламастан, әлдебір жерді һәм оның мәдениетін түсіну мүмкін емес. Сондықтан Ибицаның ескі қаласы – Dalt Vila-ға баруды ұсынамын. Ибица бекінісі қарақшылардан қорғану үшін салынған және Жерорта теңізіндегі қамалдарға қарағанда жақсы сақталған. Ішінде тас көшелердің бойымен серуендеп, өткеннің атмосферасына ене аласыз. Әлі де осы жерді мекен етіп, толыққанды өмір сүретін адамдар бар. Және соның арқасында болу керек, ескі қаладағы өмір қарқынды дамып келеді екен. Мейрамханалар, барлар, дүкендер мен бутик қонақ үйлер қыз-қыз қайнап жатыр. Кешке өнерпаз атаулының бәріне шексіз шабыт сыйлап жүрген Санта-Гертрудис ауылына барыңыз. Ұзындығы 500 метрден аспайтын негізгі көшеде заманауи өнер галереяларынан бастап, көне жиһаз дүкендері, керамика және қолмен тігілген заттарға дейін бәрін таба аласыз.

Үшінші күн

Көптеген Ибица нұсқаулықтары Лас-Далиас хиппи нарығына баруды ұсынады. Бірақ жазғы уақытта солтүстіктегі әлдеқайда жағымды Сан-Хуан қаласына баруды жөн санар едім. Оның да өз хиппи нарығы бар, тіпті музыканттар жанды дауыста өнер де көрсетіп тұрады. Ал кәдесый іздеп жүрсеңіз, жергілікті қолөнершілердің қолымен жасалған дәстүрлі сабан және кендір арқанды сандалдарды алсаңыз болады. Олардың дизайны ғасырлар бойы өзгермеген деседі. Шулы базардан шаршай алсаңыз, Giri кафесінің жайлы бақшасында “бас сауғалауға” болады.

Ибицаның солтүстігінде, жағалаудың нағыз інжу-маржаны бутик қонақ үй Los Enamorados (испан тілінде “ғашықтар”) орналасқан. Естелікке бірегей бұйымдарды да осы жерден сатып ала аласыз. Одан соң Benirras жағажайына барып, күнді батырған жөн. Мұнда аралдың түкпір-түкпірінен келген хиппилер жиналып, жағажайды ерекше әуезге бөлейді. Қараңғы түскен сайын, барабан ырғағы мен дауысы да күшейе түседі. Аспан тастүнекке оранғанда, музыка да доғарылады. Бұл рәсім 70-ші жылдардан бері орындалып келе жатқан Ибицаның төл дәстүріне айналған.

Төртінші күн

Пандемия кезінде Ибица тұрғындарының жаңа қызығушылығы пайда болды. Олар аралдың балықшылары салған соқпақтар мен және табиғатының адам аяғы тимеген көрікті жерлерін іздейтінді шығарған. Адамдардың бір орынға топтасуына тыйым салынға шақта жергілікті тұрғындар жағалаудың бойымен серуендеп, ну орманға қарай саяхат жасаған. Бұл Ибицаның сұлулығын қайта ашуға жағдай жасайды. Қазір клубтардың алдындағы кісі кезегі емес, өзінің хоббиін @Ibiza.Hike.Station брендке айналдырған әйгілі гид Мануэльдің кезектерінің қасында “ойнамай” қалады. Қазір оның командасында 10 гид жұмыс істейді. Төрт жыл бұрын біз күйеуім екеуміз оның алғашқы клиенттерінің бірі болғанда, осыншалық жоғары деңгейде дамиды деп ойламаған да шығармыз. Мануэль ауа райы мен желдің бағытына байланысты әртүрлі маршруттарды ұсынады – табиғи бассейндерден бастап, үңгірлер мен ерекше пішіндегі жартастарға дейін бәрін көрсетуге тырысады. Күннің соңында массаж, йога немесе басқа да демалыс түрлеріне баруға болады. Мұнда білікті остеопаттар, кинезиотерапевттер және басқа да денсаулық мамандары кең көлемде қызмет көрсетіп келеді. Әдемі үңгірден шексіз теңізге қарап, саунд-хилингтің сиқырын сезінуді елестетіп көрудің бойыңызды ерекше күйге бөлейді.

Бесінші күн

Ибицаға қарындасы таңғажайып Форментераны міндетті түрде аралап көріңіз. Аралға 30 минутта пароммен жетуге болады. Құрлыққа жете салып, күйеуім екеуміз электрлік велосипедтерді жалдап, Сан-Франческ қалашығына аттандық. Мұнда біз шіркеу алаңында кофе ішіп, бутиктер пен концепт-сторларды аралап, джелатодан ләззат алдық. Кейін велосипедімізге қайта мініп, Misgorn жағажайына бет аламыз. Мұнда да су – өте таза, ал құмы – аппақ.

Форментераның тағы бір ерекшелігі оның пішінінде. Арал ұзын, бірақ өте тар. Егер бір жағалауда толқындар ұнамайтын болса, бірнеше минут жүріп, екінші жағалауға өтіп кете аласыз. Әрі онда мүлде басқа атмосфераны сезінуге болады. Аралдың солтүстік жағалауы қатты толқынды, ал оңтүстігінде жергілікті тұрғындар жиі баратын мейрамханалар орналасқан. Менің сүйікті мейрамханам – Es Codolar. Ал егер тамаққа тәбетіңіз тартпай, балмұздақ жегіңіз келіп кетсе, міндетті түрде Es Moli del Sal-ға барыңыз. Мұнда балмұздақты жаңғақтар, шоколад және басқа да қоспалармен береді. Дәмі тіл үйіреді!