Жұмбақ шешуді, таза ауада серуендеуді және жаңа жерлерді зерттеуді ұнатсаңыз, геокэшингпен айналысып көрсеңіз болады. Бастау үшін:

1. телефоныңызға Geocaching қосымшасын жүктеп, тіркеліңіз;
2. картадан өзіңізге ұнаған жасырын орынды таңдаңыз;
3. таңдаған орныңызға қатысты тапсырмалары бар сипаттамалар мен оны табу жөніндегі нұсқаулықтарды оқыңыз;
4. қазынаны тапқан соң, ішінде жатқан блокнотқа белгі қойып, табылған «қазынаны» жаңа затпен алмастырыңыз;
5. қосымшада «қазынаны» табылды деп белгілеңіз.

Тіркелгеннен кейін өзіңіздің жеке жасырын орныңызды құрсаңыз болады. Алайда геокэшинг этикетін сақтауды ұмытпаңыз:

• қазына іздеу процесі елеусіз болуы керек;
• жұмбақтардың шешімі еш жерде жарияланбауы тиіс;
• жасырын орындар қолжетімді әрі қоғамдық жерлерде болуы керек;
• кей елдерде геокэшинг шаралары заңмен реттеледі (мысалы, кей жерлерде қазына жасыруға тыйым салынған).

Геокэшинг — бүкіл әлемге таралған қозғалыс, сондықтан қатысушылар бір-бірімен ағылшын тілінде сөйлеседі. Геокэшингтің тіпті өзіндік слэнгі де бар. Кейбір пайдалы терминдер:

• Cache — жасырын орын (Geocache сөзінің қысқа түрі);
• BYOP (Bring Your Own Pen) — өзіңізбен қалам әкеліңіз;
• Muggle — геокэшингке қатысы жоқ адамдар;
• GZ — тығулы орынды табуға керек, нақты координаттар;
• TNLN (Took Nothing, Left Nothing) — «қазынасы» жоқ жасырын орын;
• SWAG (Stuff We All Get) — «қазына».

Геокэшингпен тек шетелде ғана емес, Қазақстанда да айналысуға болады. Қазыналар ірі қалалармен қатар ұлттық парктерде, ауылдарда және басқа да елді мекендерде кездеседі — мысалы, Солтүстік Қазақстандағы Ақан сері және Тоқсан би ауылдарында, Ақсу-Жабағылы шатқалында, сондай-ақ Үлкен Алматы шатқалында.

Геокэшинг — басқа заттармен қатар айналысуға болатын, тамаша хобби. Бұл — жаңа қатысушылар үшін аса қиын емес, қауымдастығы тату әрі адамдардың көбі шытырман оқиғалы саяхатқа шығуды, жаңалық ашуды аңсайтынын дәлелдейтін ойын-сауық түрі. Құпиялар, жасырын хабарламалар мен белгілер — геокэшинг күнделікті өмірде байқалмайтын детальдерді көруге мүмкіндік береді. Бұл хобби бізге әлемде ғажайыптар бар екенін, оларды тек көре білу керек екенін еске салады.