Тоскана — Италияның орталық бөлігінде орналасқан, жоталы пейзаждарымен, жүзім бақтарымен және бай тарихи мұрасымен танымал өңір. Ауылдық идиллияны сүйетін жандарға Castello di Vincigliata сарайын ұсынуға болады. Бұл ортағасырлық, айналасы зәйтүн ағаштары мен жүзімдіктерге толы сарайда тоскандық аристократия стиліндегі үйлену тойын жасауға болады. Құрылыс таңғажайып Флоренцияға мен Арно өзенінің аңғарына қарайтын жотада орналасқан. Сарайдың тас қабырғалармен және аркалармен қоршалған ішкі ауласы мерекеге одан әрі шынайы атмосфера сыйлайды. Ішіне 180 адам, сыртына 250 адам сыяды.

Амальфи жағалауы — Италияның оңтүстік жағалауындағы Жерорта теңізіне керемет көрініс ашатын, әсем аймақ. Le Sirenuse — Позитаноның інжу-маржаны, XVIII ғасырда салынып, 58 сәнді бөлмесі бар бутик-отельге үйге айналған вилла. Лимон ағаштары мен бугинвиллея гүлдерімен көмкерілген басты террасасы шығанақ пен Позитаноның теңізге қарай төмендей беретін үйлеріне қарайды. Мұнда шағын іс-шара да, ауқымды мереке де ұйымдастыруға болады.

Әр бұрышы махаббатқа толы Париж үйлену тойын жасайтын ең романтикалық жерлердің бірі болып қала береді. Shangri-La Paris — Наполеонның жиені ханзада Ролан Бонапарттың бұрынғы сарайында орналасқан отель. Мұнда естен кетпес той жасағысы келетін жандарға арналған үш түрлі топтама бар. Signature топтамасы Парижге ғажап көрініс ашатын террасаны жалға алуды, Мишлен жұлдызына ие бас аспазшы әзірлеген тағамдардың дәмін татуды және жас жұбайлардың люксі мен таңғы асын қамтиды. Ірірек іс-шараларға арналған Prestigious топтамасына қонақтарды коктейльмен күтіп алу және бал залындағы би кеші секілді қосымша қызметтер кіреді. Imperial — сарайдың бірінші қабатын толығымен жалға алуға мүмкіндік беретін, ең беделді топтама. Мұндай ауқымды тойға 300 адам шақыруға болады.

Мальдив аралдары — 1190 маржан аралынан тұратын, әр жері өзіндік ерекшелікке ие архипелаг. One & Only Reethi Rah Мальдив аралдарының ең басты атоллында — Солтүстік Маледе орналасқан. Үйлену тойын жасауға жарайтын бірнеше көркем орын бар: жеке Turtle Beach жағажайы, жасыл бақтағы шіркеу және мұхитқа қарайтын, су үстіндегі, романтикалық вилла. Мұнда не дәстүрлі мальдивтік той, не классикалық еуропалық той жасауға болады. Дәстүрлі Bodu Beru рәсіміне ритуалдық барабандар, ұлттық киімдер және жергілікті имамның батасы кіреді.

Бали — қайталанбас күнбатыс пен мәңгі үйлесім құпиясын сақтаған храмдардың жері. Нуса-Дуаның көрікті жартастарында орналасқан The Apurva Kempinski Bali сарайы үйлену тойын жасауға арналған үш бірегей шіркеу ұсынады: Ocean Front Apurva Chapel, Amala Chapel және Kimaya Chapel. Біріншісі — Үнді мұхитына қарайтын, әйнек шіркеу. Сыйымдылығы — 100 адам, күннің батуы кезінде ерекше романтикалық атмосфераға бөленеді. Екіншісі — балийлік стильдегі нәзік элементтермен безендірілген, тропиктік бақтарға қарайтын, таңдаулы орын. 50 қонаққа арналған шағын, жайлы шіркеу. Үшіншісі — минималистік дизайнымен ерекшеленетін және жасыл желекпен қоршалған, отельдің етегінде орналасқан шіркеу. 50 шақты қонақ қабылдауға жарайды. Сондай-ақ The Apurva Kempinski Bali сарайында «орнықты той» жасауға болады — бұл концепция экологиялық таза өнімдерді қолдануды, пластикті азайтуды және маржан рифтерін қорғауға үлес қосуды қамтиды.

Дубровник — Хорватияда теңіз жағалауында орналасқан, ортағасырлық бекіністері мен сәулеті жақсы сақталған қала. Ал Fort Lovrijenac — ортағасырлық атмосфераға сай той жасауды армандайтындардың көңілінен шығатын орын. XVI ғасырда салынған әрі аумағында «Тақтар ойыны» сериалы түсірілген бұл бекініс Адриатика теңізіне және Дубровниктің Ескі қаласына қарайтын жартаста орналасқан. Мұнда екі адамға арналған қарапайым рәсім де, 150 қонаққа арналған үлкен мейрам да жасауға болады.

Пунта-Кана — Атлант мұхиты мен Кариб теңізі тоғысқан, 32 шақырымға созылған, ақ құмды жағажайларымен, көгілдір суларымен ерекшеленетін аймақ. Kukua Beach Club — Пунта-Кананың жағалауының ең көркем бөлігінде орналасқан орын. Мұнда тай жасаудың бірнеше сценарийі бар. Біріншісі — жағажайдағы салтанат, көгілдір теңіз алдына арка орнатылады. Екіншісі — бақтағы мейрам. Соңғысы — 180 адамға арналған, сәнді мейрамханадағы той. Сондай-ақ бохо не гламурлы винтаж сияқты стильдердегі тақырыптық тойларды жасау мүмкіндігі бар.

Кейптаун — Оңтүстік Африканың оңтүстік-батысында — Үстел тауы Атлант және Үнді мұхиттарымен түйіскен жерде орналасқан, портты қала. Groot Constantia — Оңтүстік Африканың 1685 жылы негізі қаланған, ең көне шарап зауыты. Кейптаунның үйлену той жасайтын ең әсем орындардың бірі қала орталығынан небары 20 минут жерде орналасқан. Тойды Jonkershuis Restaurant және Simon's Restaurant ресторандарында жасауға болады.

Констанция аңғары мен түбекке қарайтын Jonkershuis Restaurant — мәдени мұраға бай жер. Мұнда бірнеше түрлі той жасайтын орын қарастырылған: көздің жауын алатын Groot Constantia жүзімдіктері мен False Bay жағажайы және 400 жыл бұрын салынған Groot Constantia Manor House жекежайының алдындағы, емен ағаштары қоршаған аллея. 200 қонақ шақыруға болады.

Simon's Restaurant Кап аймағының шарап жасау дәстүрімен таныстыратын әрі той жасауға әбден жарайтын бірнеше кеңістік ұсынады. Күн бұлтты болғанда не 100 адамға арналған негізгі залды, не 70 адамға арналған мезонинді, не екеуін қосып жалға алуға болады. Күн ашық кезде тойды 180 адамдық террасада не 160 адамдық пикник алаңында жасауға болады.

Бора-Бора — Француз Полинезиясының барьерлік рифпен қоршалған атоллы. Аралдың ортасында сөнген Отеману жанартауы орналасқан. Биіктігі 727 метр. The St. Regis Bora Bora Resort — люкс санатындағы бес жұлдызды курорт. Той жасайтын үш таңғажайып орны бар: Spa Beach (жеке аралдағы жағажай), 727 Bar (Lagoon by Jean-Georges Ресторанының су үстіндегі террасасы) және Main Beach (Бора-Бора лагунасына қарайтын басты жағажай). Соңғысы дәстүрлі полинезиялық үйлену тойын жасауға және 250 адам шақыруға мүмкіндік береді.