Үш тілді асаба Дэниел Джеймс

400 мыңнан 1 миллион 200 мың теңгеге дейін

Асабаның гонорары танымалдығы мен тәжірибесіне тікелей байланысты. Жаңа бастаған жүргізушілер 100–300 мың теңге аралығында алса, тәжірибелі мамандардың бағасы 400 мыңнан 1,5 миллион теңгеге дейін жетеді. Ал Instagram-да 2 миллионнан астам жазылушысы бар асаба-инфлюенсерлердің бір кешке алатын ақысы $10–15 мың (шамамен 4 млн 900 мыңнан 7 млн 355 мың теңгеге дейін).

«Ең жоғары гонорарым – $25 мың, Түркияның Измир қаласындағы тойда алдым. Жігіт – Ұлыбританиядан, қалыңдық – Қазақстаннан. Бұл сомаға жеке сценарий, интерактивті ойындар, музыкалық сүйемелдеу мен шоу-бағдарлама кірді. Әр асаба қызмет пакетін өз бетінше жасақтайды, бұл салада бірыңғай стандарт жоқ.

Тойда тосын жағдай жиі болады. Бірде қалыңдық күйеуімен сөзге келіп, қонақтардың алдына шығудан бас тартты. Мен бір сағат бойы түрлі ойындармен қонақтардың көңілін аулаумен болдым. Тағы бір тойда беташар жүргізушісі кешігіп, домбыраны қолыма алып, беташарды өзім өткізуге тура келді. Бірде тойдың қызған кезінде кенет жарық сөніп қалды. Абырой болғанда, мен үнемі өзіммен бірге африкалық барабандарымды алып жүремін. Қонақтарды тыныштандыру үшін шұғыл барабан-шоу ұйымдастырып, қоанқтарды ортаға алып, жарық жанғанша көңіл көтердік», – дейді Дэниел Джеймс.

Айгүл, Ivory қалыңдық көйлектері салонының иесі

300 мыңнан 1 млн 460 мың теңгеге дейін

Ivory салонындағы көйлектердің орташа бағасы 400–600 мың теңге, бірақ кейбір үлгілердің құны 1 млн 300 мың теңгеден асып жығылады. Аксессуарлар да маңызды рөл атқарады. Мұнда испандық, классикалық, інжу, моншақ не шілтермен көмкерілген эксклюзив фаталар да ұсынылады. Бағасы 30 мыңнан басталып, 110 мың теңгеге дейін барады, ал басқа әшекейлер 15–50 мың теңгедей болады. Көйлектен үнемдеуге болар, бірақ аксессуарлар мінсіз болуы тиіс. Себебі қалыңдықтың образын толықтырып, ерекшелеп тұратын – сол аксессуар. 

Той фотографы Тайыр

400 мың теңгеден басталады

Фотограф Тайыр Жақановтың айтуынша, бір күндік түсірілімнің бағасы 400 мың теңгеден басталады. Қызмет құны маманның танымалдығы мен кәсіби деңгейіне байланысты. Қазір қайтадан қара-ақ түсті, «тірі» және табиғи кадрлар сәнге айналды. Жас жұбайлардың көбі фото мен бейнероликті бірге алатын толық пакетті таңдайды. Ал бюджеттік, шағын тойларда тек фото және highlight reel деп аталатын қысқаша бейнеролик (3–5 минуттық той ролигі) сұранысқа ие.

Something Else декор студиясы: әр деталь өзінше сиқырлы

300 мыңнан 2 млн теңгеге дейін

Something Else декор студиясында 100 адамға арналған тойды рәсімдеу 2 миллион теңгеге шығады. Бұл бағаға қалыңдықтың гүл шоғы, үстелге қойылатын гүл композициялары, қарсы алу баннері, үстелді безендіру, гүл құмыралары, шақыру билеттері және декоратордың қызметі кіреді.

Трендтер: Ұлттық реңкпен толыққан минимализм

Қазақтың тойы ет асу секілді: әр үйдің өз рецепті бар, бірақ бәрі дос-жаран, көрші-қолаң жасаған тойдан асып түскісі келеді. Біреулер люкс көлік кортежі мен жұлдыз асабаларды қаласа, енді бірі тау бөктеріндегі қарапайым кешті армандайды. Бірақ бәріне ортақ бір тілекбар. Ол – «ерекше етіп жасайық, қонақтар сөгіп кетпесін».

Светлана, Ido Wedding:
«Қазақстандық тойлар – дәстүр мен жаһандық трендтердің тоғысы. Кейбірі минимализм мен еуропалық кешкі асты қаласа, енді біреулер сән-салтанаты жарасқан, ұлттық нақыштағы тойды қалайды. Пандемиядан кейін қарапайым һәм талғампаз стильге басымдық беретін болған. Бірақ премиум сегментте жеке сценарий мен ұмытылмас шоуға деген сұраныс әлі де жоғары».

Дэниел Джеймс, асаба:
«Қазір екі-үш тілде жүргізетін асабалар үлкен сұранысқа ие. Тойлардың 50–60%-ы аралас форматта өтеді. Әр аймақтың өз салты бар. Мысалы, Қостанай мен Қарағандыда той кезінде ерекше шай үстелі жайылады – жастар би билеп жатқанда, үлкендер бөлек залда шай ішіп, тәтті-дәмдіден ауыз тие отырып, әңгіме-дүкен құрады. Алматыда шағын, камерлық тойлар танымал. Беташар қысқартылып, артық сөзсіз өтеді. Тойдың бірінші бөлігі дәстүрлі түрде, екіншісі еуропалық форматта ұйымдастырылады.

Тағы бір жаңашыл үрдіс – «қалта шоу». Бұл – үзіліс кезінде тойды ұйымдастырушы жақтың бәйбішесінің бөлек бөлмеде қонақтарға сыйлық тарату дәстүрі. Бұл қуанышты бөлісу ниетінің тағы бір белгісі болса керек».

Park Hall ұжымы: 
«Жаңа түскен жұптың тікелей залға кабриолетпен кіріп келуі. Мұндай көлікті Easy Rent автосалонынан тәулігіне 150–400 мың теңгеге жалға алуға болады».

Айгүл, Ivory салоны:
«Қазіргі қалыңдықтар бір қарағанда қарапайым, бірақ ерекше көйлектерді қалайды: жабық үлгідегі, шілтерлі матадан тігілген, ауқымы үлкен етегі бар түрлері, ойық өрнектер, корсет стилі және гүлді оюлар трендте. Ұлттық образдарға деген қызығушылық та азайған жоқ: айвори түсті камзол, кәжекей, сәукеле – барлығы қымбат матадан тігілген, қолмен кестеленген болуы керек».

Мұндай той қанша тұрады?

Ертегідегідей етіп өткізу қалтаның қалыңдығына тікелей байланысты.

Қарапайым тойдың өзіне 4 млн 850 мың теңгедей жұмсалады. Бірақ егер сіз сахнадағы жұлдыздарды, дронмен түсірілімді, төбеден төгілген раушан гүлін, шоу-балетті армандасаңыз, оған да мархабат. Есте болар бір жайт, мұндай кештің құны 150 миллион теңгеге жетеғабыл болуы мүмкін.

Дегенмен ең керемет тойдың өзі – отбасылық өмірге бастар жолдың алғашқы қадамы ғана. Шын жүректен айтылған тост пен шынайы күлкі – кез келген сән-салтанаттан әлдеқайда қымбат.