Голливудтың әмбебап актерлерінің бірі Николас Холтты сөз қыламыз
Америкалық boygenius тобының Not Strong Enough әнінде былай делінеді: Always an angel, never a god («Періштесі періште, бірақ құдай емес»). Адамның өзін-өзі кем көруін, қайтпас ойларды, құнсыздықты бейнелейтін өлең жолдары. («Періштесі періште, бірақ құдай емес» жолдарын Николас Холттың актерлік жолымен ұштастыруға болады. «Періштесі періште, бірақ құдай емес» пе әлде өз буынының үздік актері ме? Николас Холттың мансаптық жолын талдап, 2024 жылғы өзгерістердің оған қалай әсер еткенін сөз етеміз.
Актердің үлкен экрандағы дебюті 1996 жылы болған еді. Жеті жасар Николас Intimate Relations фильмінде шағын рөлді сомдады. Сондықтан да оның мансабы ресми түрде Хью Грантпен бірге түскен About a Boy картинасынан бастау алады деуге болады. Сыншылар фильмге жоғары баға берген болатын. Осы сәттен бастап жас актердің сансыз номинацияға ілігіп, анда-санда жеңіс тұғырынан көрінетін кезеңі басталды. Бүгінге дейін 44 номинацияға ие Николас тек 14 рет жеңіске жеткен. Онда да аса танымал емес марапаттар. «Алтын глобус» та, BAFTA-ның театр маскасы да, «Оскар» да жоқ.
Танымалдық пен басты рөлдер – байғұс актерге бұйырмаған қос дүние. Жүрегі меланхолияға толы сыпайы жігіттің образынан арылмақ болып, «ерлер» киносына да бет бұрды. Николас Top Gun: Maverick фильміндегі Рустердің рөліне көз салған еді, бірақ ол Майлз Теллерге бұйырды. The Great комедиялық жобасына байланысты жетінші Mission: Impossible фильміне түсуден де бас тартуға тура келді. Жаңа Бэтменнің рөлін Роберт Паттинсон сомдады. Әлдеқашан қанішер образымен танылған Роберттің жарқанат рөлін сомдауы – орынды жайт. Николас «готикаға» 2023 жылы жетіп, Ренфилд комедиясында қанішердің қызметшісі болды. Бір жылдан кейін «Носферату» хоррорында актер қанішерге қарсы тұрды. Айтпақшы, «Носферату» фильмінің Қазақстанда қызу талқыланғанын айта кету керек. Себеп – жөнсіз цензура. Фильмнен кейіпкерлер шешінбей-ақ түскен жыныстық қатынас көріністері, вампирмен сүйісу және оның бас кейіпкердің жалаңаш төсіне тіс батырған сәттері алынып тасталды.
