Ақберен Елгезектің автобиографиялық повесінің кинематографиялық бейнесі қазақстандық көрерменді қалай тәнті қылғаны туралы әңгімелейміз.
Бестселлер
«Болмаған балалық шақ» фильмінің айналасындағы ажиотаж 27 ақпан күні өткен премьерасынан басталды. Тіпті дүйсенбі күні Алматыдағы ел арасында танымал емес деген кинотеатрдың өзі көрерменге лық толы болды. Өз көзімізбен көріп қайттық. Оқырмандар «автор хикаяға артық дүние қосып, сүйікті кейіпкерімнің образын бүлдірген жоқ па екен?» деп, өздеріне таныс әдеби шығарманың кинонұсқасын тамашалауға асықты. Фильм әсерлігі жағынан түпнұсқадан кем болмай шықты.
Танымал қазақ жазушысы, ақын Ақберен Елгезектің 2008 жылы жарық көрген автобиографиялық повесі бірден бестселлерге айналды. Тиражы 40 мың данадан асқан кітап Amazon және Barnes & Noble платформаларында да оқылды. Елгезектің шығармасы негізінде спектакль қойған үш республикалық театрда да аншлаг болды. Кино шолушысы Ғалия Байжанова айтпақшы, бұл – «үлкен экранға баяғыда-ақ шығатын картина». Режиссері – қазақстандықтарға «Дос-Мұқасан» (2021) музыкалық байопигі арқылы таныс Айдын Сахаман.
Бала VS Құбыжық
«Болмаған балалық шақ» – болмай қалған балалық шақ туралы хикая. Жастайынан әкесінен айырылған Ақберен (жақындары Ақош дейді) анасымен қалады. Үйде үшеу, ағасы ауыр дертке шалдыққан. Анасы (Ақбота Рахат) ортаншы баласын емдетемін деп, ауылдың үрейін ұшырған жылқышы Тағаймен қосылады. Қатыгез Тағай балаға мейірім шуағын төкпек түгілі, күн көрсетпей қояды. Тағдырдың жазуымен (сондай-ақ қазақы дәстүрдің арқасында) Ақберенді марқұм әкесінің туыстары алып кетеді. Үйінен алшақтаса да, кішкентай бала анасын «құбыжықтан» құтқару туралы ойлай береді. Сөйтіп жүріп, Ақош қиял әлемінен пана табады. Ол әлем Ақошты әлсіз бала ретінде емес, көне күшті бағындырып, анасын арбаған құбыжықты жеңетін қаһарман ретінде қарсы алады. Ақиқат көзін ашып, Ақберен қамал атаулының барлығы күшпен алынбайтынын түсінеді.
