Команда

Жоба авторлары дыбыс пен видеоның сапасын неғұрлым жоғары қылып, ғасырлар бойы ұмытылмайтын шығарма жазғысы келген екен. Оны жүзеге асыруға продюсерлер Мария Мун (NOTO agency маркетинг агенттігінің негізін қалаушы) мен Камила Серкебаева (AIR Studios атқарушы директоры), сондай-ақ бейнебаян режиссері Жанат Алшанова жауапты болды.

Аты аңызға айналған студия

Трек AIR дыбыс жазу компаниясының Лондон қаласындағы студияларының бірінде жазылды. Джордж Мартин (The Beatles) мен үш музыкалық продюсер бірігіп ашқан AIR Studios-та бұған дейін Пол Маккартни, Билли Айлиш, Pink Floyd, Queen, Radiohead және Sex Pistols сынды әртістер мен топтардың альбомдары, сондай-ақ «Кит», «Гранд Будапешт» отелі», «Хәрри Поттер мен пәлсапа тас» фильмдерінің, Stranger Things сериалының, Star Wars Jedi: Survivor видео ойынының саундтрегі жасалып, басқа да музыкалық жобалар жүзеге асырылған екен.

«AIR Studios-қа барып, жазба жасау арманым еді. Көптеген музыканттар студияны, оның әлемге әйгілі акустикасын өз көзімен көріп, өз құлағымен естігісі келеді деп ойлаймын. Жайлы жер екен, дыбысы сұмдық енді. Мария Мун мен Камила Серкебаеваға осындай мүмкіндік бергені үшін алғыс айтамын», – дейді Молданазар.

Тарихи оқиға

Arbir Janga әнін жазуға мүшелері Голливуд фильмдерінің саундтрегі мен әлемдік деңгейдегі жұлдыздардың альбомдарын әзірлеуге қатысқан Лондон студиялық оркестрі атсалысқан екен. Қазақстандық және ағылшын музыканттары арасындағы коллаборация заманауи Қазақстан үшін маңызды әрі ерекше жайт. Қазақ тілі үні аты аңызға айналған студияда жаңғырды, ал қазақстандық әртістің шығармасын Лондон қаласының ең үздік музыканттары орындады.