Жапония, Эдо дәуірі — ел шетелдіктерге жабық, ал жергілікті заң қатал болған уақыт. Алайда көк көзді Мизу ережелерді өзіне мәлім мақсатпен бұзады. Бойында жапондық және еуропалық қан араласқан, жұмбақ самурай қыз басынан өткерген қиындықтары үшін кек алуға, сондай-ақ өз тұқымының рухтарымен күресуге әрдайым дайын. Әр шайқас, әр оқиға ақиқатты айқара ашатын қылыш секілді. «Энни» және «Шығармашылық өнер саласындағы Эмми» сыйлықтарымен марапатталған бұл мультсериалдың екінші маусымы шықпақ екен. 2026 жыл, Netflix.

Blue Spirit — 2004 жылы құрылған студия әрі продакшн. Кеңселері Францияда (Анже, Париж) және Канадада (Монреаль) орналасқан. Студия Marvel-дің «Былай болса ше...?» анимациялық антологиясының 10 эпизодын жасап, комикстер стиліне келетін, ерекше анимациясымен танылды.

Су басқан, жануарлар тіршілік ету үшін құрлық іздеген әлемде біз тастанды қалалар мен ну ормандарды саяхаттап жүрген, қаңғыбас қара мысықты кездестіреміз. Ол жолдан капибара, лемур, құс және ит сияқты дос табады. Тағдырлары сынақ барысында тоғысып, әрқайсы тірі қалуды, сенім артуды және өзгелердің ерекшеліктерін қабылдай білуді үйренеді. Мультфильм жан тебірентерлік әрі әсерлі хикаяларды сүйетіндер үшін must-see. «Ағыс» саладағы ең беделді сыйлықтардың бірі — Ансидегі халықаралық анимациялық фестивальде бірнеше марапатқа, соның ішінде қазылар алқасының және көрермендердің ықыласы сыйлықтарына ие болды.

Take Five пен Sacrebleu Productions — Бельгия мен Францияда құрылған студиялар. Take Five 2009 жылы Брюссельде, ал Sacrebleu Productions 1999 жылы Парижде пайда болды. Sacrebleu Productions 90-нан астам қысқа метражды фильм түсіріп, Канн, Берлин, Венеция және Хиросима фестивальдерінде бірнеше рет марапатталған болатын.

Нью-Йорк, канализация және мутаген — Леонардо, Микеланджело, Рафаэль және Донателло атты төрт ағалы-інілі тасбақалар мен Сплинтер есімді дана егеуқұйрықты қалыптастырған элементтер. Бұл жасөспірім тасбақалар жер астында өсіп, жер үстіндегі адамдарды мойындатқысы келеді. Мутанттар тобы мен олардың көсемі — Суперфлай есімді мутант шыбынмен күресіп, қоғамға пайдалы бола алатынын дәлелдегісі келеді. «Ниндзя тасбақалардың» жаңа нұсқасы 1987 жылғы мультсериалдан, режиссердің мектептегі эскиздерінен және жасөспірімдердің басынан өтетін әр түрлі оқиғалардан шабыт ала отырып жасалған.

Mikros Animation — 1985 жылы құрылған, Монреаль, Париж, Бангалор қалаларында кеңселері бар продакшн. «Ниндзя тасбақалар: Мутанттар бүлігін» жасау үшін студия Cinesite студиясының Ванкувер және Монреаль қалаларындағы филиалдарымен бірігіп жұмыс істеген болатын. Autodesk Arnold бағдарламасының негізінде арнайы шейдер-прототип әзірлеген Mikros Animation детальдер мен жарққа баса көңіл бөліп, «боялған» эффект жасаған екен.

Қатты дауыл кезінде ROZZUM-7134 немесе жай ғана Роз атты робот иесіз арал жағалауына шығып қалады. Жергілікті тұрғындар роботтан қорқып, оған ашулана түседі. Алайда Роз жаңа әлемді зерттеп, оның тұрғындарымен байланыс орнатып, жұмыртқадан шыққан балапанды Сарытұмсық деп атап, оны асырай бастайды. Уақыт өте келе балапан бүкіл аралдың тағдырына әсер етеді. Жабайы робот жөніндегі бұл хикая сыншылардың да, көрермендердің де көңілінен шықты.

Жоғарыда аталған студиялармен салыстырғанда DreamWorks Animation студиясы — таныстыруды қажет етпейтін, сала алыбы. «Шрек», «Кунг-фу панда», «Мадагаскар» сияқты туындыларымен танымал студия үшін «Жабайы робот» өз күшімен жасаған соңғы жобасы болды. Болашақта студия мультфильм жасауға сыртқы өндірушілерді тартпақ.