2024: әлем әншілері не ұсынды?

2024 жылдың ең жақсы музыкалық өнімдері туралы сөз қозғап, есте қалған орындаушылар мен авторларды жинап қойдық

2024 жыл тыңдармандарды ерекше музыкалық релиздермен һәм жаңалықтармен қуантып келеді. Өнер иелері музыка шығару тәсілдерін жаңғыртқан болып, жанрлармен эксперимент жасап, туындыларына жүрдім-бардым қарамай, терең мағынамен құнарлы ете түсуді мақсат еткен. Әсіресе ішкі толғаныс пен жеке басының оқиғалары әннің сөзіне, рэптің тармақтарына арқау болған. Оған қоса, өткен дәуірдің танымал әртістері ұзақ үзілістен кейін сахнаға қайта оралып, өздерінің культ статустарын тағы бір мәрте дәлелдеп, шығармашылықтағы үзілістердің пайдасын да көрсеткенін дүйім жұрт байқамады емес, байқады. Сонымен қатар, жас әрі енді танылып келе жатқан музыканттар тың жанрлардың тасын өрге домалатып, тыңдарманның жүрегін жаулағанына да куә болдық. 2024 жылдың ең үздік музыкалық релиздерінің қатарына әдеттегі поп-музыка мен хип-хоптан бастап, сирек танылатын артхаустау жанрлар да енді. Ал, кеттік!

BRAT – Charli XCX

Charli XCX-тің алтыншы студиялық альбомы 2024 жылдың басты музыкалық жаңалықтарының бірі болып танылды. Британдық әншінің бұл еңбегі сыншылар тарапынан жоғары бағаланып, тыңдармандардың ыстық ықыласына бөленді. BRAT арқылы Charli XCX жұрт құлағына бөтендеу гиперпоп жанрын кең аудиторияға жеткізіп, оны танымал етті. Бұл альбом тек музыкалық туынды ғана емес, сонымен қатар мәдени феноменге айналып, көптеген мемдер, трендтер мен индустриядағы жаңа тенденцияларға жол ашты. Осы еңбегі үшін Шарлотта Эйтчисонды қазіргі поп-музыканың ең креативті және көрнекті өкілдерінің бірі деп атай бастады. Жастарға арналған гиперпоп стиліне және альбомның еркін әрі тентектеу мінезіне қарамастан, оның лирикасы тереңдігімен және кемелдігімен ерекшеленеді. Альбом арқылы Charli ішкі жан сырын, сезімдері мен толғаныстарын ашық түрде жеткізе алған.

1 / 1

CHROMAKOPIA – Tyler, The Creator

Chromakopia альбомын Тайлер, The Creator толықтай өзі продюсерлеген. Бұл туындысында ол өз стилін жетілдіріп, эклектикалық дыбыстармен тәжірибе жасауды жалғастырған. Альбомның басты тақырыптары – балалық шақ, есею кезеңі және Тайлердің ішкі уайымы. Рэпердің ең шынайы жобаларының бірі ретінде бағаланған жинақ әкесімен болған мәселелері туралы сыр шертіп, бұрынсоңды еш жерде айтылмаған оқиғаларын баяндайды. Сондай-ақ, атақ-даңқтың құны соншалықты жоғары ма деген сұрақтарға жауап іздеп, тыңдарманға ішкі толғаныстарынан сыр шертеді.

1 / 1

Hit Me Hard And Soft – Billie Eilish

Билли Айлиштің үшінші студиялық альбомы алдыңғы жинақтардағыдай ағасы Финнеас О’Коннеллдің продюсерлігінен өткен. Hit Me Hard and Soft альбомының лирикалық тақырыптары меланхолияға бой алдырып, махаббат, қарым-қатынас пен өзгеге құмарлық тақырыптарын қозғайды. Биллидің алдыңғы жұмыстарымен салыстырғанда бұл жобада эксперимент аздау. Десе де, бұл жинақты сарапшылар шығармашылық кемелдікке жасалған ірі қадам деп бағалап отыр.

1 / 1

Short n' Sweet – Sabrina Carpenter

Сабрина Карпентердің алтыншы альбомының атауы сылқым бикештің қысқа болса да тәтті махаббатын меңзейді. Өзі де сол жарқ етіп жоқ болған шоқжұлдыздай сезім жайлы шырқайды. Ән мәтіні қарапайым, тілге жеңіл. Осы топтамадағы өзге әртістердер сонысымен ерекше. Бұл альбом жазғы көңіл күй сыйлап, жүрегіңізді әуезді балладасымен тербеп әкетеді.

1 / 1

Songs of a Lost World – The Cure

2024 жыл атақты музыкалық топтардың күтпеген жаңа релиздеріне бай болды дедік қой. Солардың қатарында Linkin Park, Green Day және The Cure бар. Әсіресе, The Cure ерекше көзге түсіп, өзінің 14-ші студиялық альбомы Songs of a Lost World-ты шығарды. Бұл туынды британдық рок-топтың өзіне тән дыбыс ерекшелігін сақтай отырып, шеберлігін тағы бір мәрте дәлелдеген туынды болды. Songs of a Lost World – өткеннің жылылығы сезілетін альбом. Онда классикалық готик-рок, дрим-поп және колдвейв сияқты жанрлардың үндестігі тамаша үйлесім тапқан.

1 / 1

In Waves – Jamie xx

Jamie xx-тың соңғы шығарған In Colour альбомынан бері, міне, тоғыз жыл өткен еді. Жарқ етіп жасындай жалт ете қалған In Waves британдық диджейдің соңғы релизі көрінеді. Құлаққа жағымды аспаптық орындау мен биге арналған хаус-ритмдерге толы туынды вокалдық сэмплдерге көңіл бөліп, өзге де әртістермен қатар өнер көрсеткен. Олардың қатарында The xx, Robyn, The Avalanches және басқа да танымал орындаушылар бар. Сыншылар Джейми Смиттің жоғары деңгейдегі продюсерлік жұмысын ерекше атап өтіп, альбомдағы кейбір композицияларды 2024 жылдың ең үздік би тректері деп бағалап үлгерді.

1 / 1

Wild God – Nick Cave & The Bad Seeds

Бұл австралиялық Nick Cave & The Bad Seeds рок-тобының қуатты әрі эмоцияға бай альбомы ретінде тыңдармандардың жүрегін жаулады. Тағы біреулер үшін The Bad Seeds-тің араға ұзақ уақыт салып, толық құраммен жасап шығарған алғашқы жобасы ретінде де есте қалды. Wild God топтың танымал түнек шарпыған атмосферасы, бай оркестрлік аранжировканы, әсерлі лирика мен Кейвтің қайталанбас вокалының арасында ерекше үйлесім тапқан. Орындаушының айтуынша, Wild God – топтың эмоционалды және рухани сезімін дәл жеткізген күрделі туынды. Және бұл жолы бұл туынды бақыт сезімімен шарықтау шыңына жеткен.

1 / 1

Charm – Clairo

Клэр Коттриллдің үшінші студиялық альбомы Pretty Girl атты bedroom pop шығармасы арқасында танымал бола түсті. Атланталық автор жаңа жобасына аңызға айналған соул жұлдызы Ли Филдспен жұмыс істеген мультиинструменталист Леон Майклс продюсерлік еткен. Charm дыбысы 70-жылдардағы жұмсақ рок, джаз мелодиялары және фолк музыкасымен құнарлана түскен. Еміс-еміс естілетін меланхолиялық лирика тұрақсыз сезім, жалғыздық, күйзеліс және махаббатты аңсау секілді тақырыптардан сыр шертеді.

1 / 1

GNX – Kendrick Lamar

Бұл релиз Кендрик Ламардың күтпеген жерден шыққан альбомы болды. Жаңа дүниенің жасалып жатқанынан рэпердің наурыз айындағы әлеуметтік желідегі жазбасы ғана белгі берген болу керек. Онда ол 1987 жылғы винтажды Buick Grand National Experimental (GNX) көлігін сатып алғанын айтқан еді. Өмірбаянына сүйенсек, көліктің дәл осы моделімен оның әкесі Кендрикті перзентханадан алып шыққан көрінед. Кейбір сыншылар GNX альбомын Ламардың ең үздік жұмысы деп бағалап отыр. Атап айтқанда, оның энергиясы мен шығармашылыққа деген жаңа көзқарасын жоғары бағаланды. Тректер тез есте қалып, бірден миға қонып алады. Сол жағынан алғанда өнерпаз альбомның терең мазмұнынан гөрі сатылымы мен тыңдалымына көбірек мән берген сияқты.

1 / 1

Imaginal Disk – Magdalena Bay

Бұл – Флоридадан шыққан alt/pop-дуэттің екінші студиялық альбомы, онда синти-поп элементтері альтернативті диско, психоделия, прогрессивті рок және би музыкасымен наурыз көжедегідей тамаша үйлесім тапқан. Imaginal Disk осыған дейін шыққан Mercurial World альбомымен салыстырғанда әлдеқайда батыл жоба ретінде бағаланды. Альбомның атмосферасы жарқын және қайғылы сәттер арасында өзінше бір тепе-теңдік қалыптастырған. Бір жағынан ән мәтіндері мен музыкалық құрылым арасында айтарлықтай қайшылы та байқалады. Лирикалық тұрғыдан Imaginal Disk өзін-өзі тану, махаббат, өлім, уақыт және өз болмысыңды қабылдау тақырыптарын бойлаған. Техникалық жағынан дыбыс құдды бір ғарыш не болашақтың әсерін береді.

1 / 1

Темы

Таңдау Музыка

Tatler Asia

2024 жылы әлем бойынша жарық көрген әндердің үздік топтамасы

BRAT – Charli XCX

CHROMAKOPIA – Tyler, The Creator

Hit Me Hard And Soft – Billie Eilish

Short n' Sweet – Sabrina Carpenter

Songs of a Lost World – The Cure

In Waves – Jamie xx

Wild God – Nick Cave & The Bad Seeds

Charm – Clairo

GNX – Kendrick Lamar

Imaginal Disk – Magdalena Bay