Lorelei and the Laser Eyes

Платформалар: Nintendo Switch, Windows

Пазлдар мен нуар стиліндегі детективтердің жанкүйерлеріне арналады. Ойында 150-ден астам пазл бар, оларды ретсіз түрде шешуге болады. Яғни, сізді ешкім шектемейді, қалаған жағыңызға бара бересіз. Ең басында ойын қолыңызға блокнот пен қалам алуға кеңес береді, шын әлемде, әрине. Өйткені сізге ешкім қол ұшын бермейді, берілетін көмек мөлшері шектеулі. Әрбір ұсақ-түйек затты, детальді және ерекшелікті сол блокнотқа жазып отырған жөн. Қазымыр, дәлдікті жақсы көретін, ОКБ-ға шалдыққан жан болсаңыз, Lorelei and the Laser Eyes ойынына көз салуға кеңес береміз.

Dread Delusion

Платформалар: Windows

Адам үш ұйықтаса түсіне кірмейтін қорқыныштарға толы, қапас, оккульттық фэнтези. Dread Delusion жаңа ойыншыларға күрделі әрі тым ерекше болып көрінуі мүмкін. Визуал жағынан бұл — Сальвадор Далидің сюрреализмі мен Говард Лавкрафттың қорқыныш элементтері ұштасқан, low poly стиліндегі ойын.

Механикасы 90-шы және 2000-шы жылдардағы ойындарға ұқсайды. Кей жерлері ұнамды түрде «шикі», қанша айтқанмен инди ғой. Алайда жалпы алғанда бұл — бәрімізге үйреншікті әрі сапалы RPG.

First Cut: Samurai Duel

Платформалар: Windows

Акира Куросава мен оның самурай дуэльдерінің, сондай-ақ Тарантиноның қанды көріністерінің жанкүйерлеріне ұнайтын ойын. Өзі өте қарапайым— 2D форматындағы қанқұйлы жекпе-жек. Дегенмен эстетикасы 100 баллға лайық. Әрбір жекпе-жек — Жапония режиссерлерінің үздік дәстүрлеріне сай, кинематографиялық көрініс.

Tiny Glade

Платформалар: Windows

Медитация күйіне кіргізетін, сүйкімді, жайлы әрі эскапистік құрылыс симуляторы. Cottagecore эстетикасынан шабыт ала отырып әзірленген Tiny Glade әр ойыншыға өзінің жеке «Кіп-кішкентай алаңқайын» салуға мүмкіндік береді. Мұнда ресурстар менеджменті де, ұрыс-керіс те, соғыс та, тіпті сюжет те жоқ. Мұнда сізге ешкім ұрыспайды, өйткені бұл ойында бұрыс жол деген жоқ. Бұл — Lego конструкторының цифрлық түрі, яғни ойыншыны тек оның қиялы ғана шектейді. Сонымен қатар мұнда қозыларды сипауға болады. 2024 жылдың ең үздік ойындарының бірі екені анық.

While We Wait Here

Платформалар: Nintendo Switch, PlayStation 5, Xbox Series X|S, Mac OS

Ойыннан гөрі әлеуметтік экспериментке көбірек ұқсайтын туынды. Бұл ойында сіз айдалада жатқан бір шағын дәмхананың иесісіз: келушілерге бургер пісіріп, сусын құйып беріп, олармен әңгімелесесіз. Алайда ақыр заманның келуі туралы жаңалық байсады өміріңізден түк қалдырмайды. Катастрофа жақындап қалды, одан қашып құтылу мүмкін емес. Кейбіреулер тағдырын стоиктер сияқты қабылдаса, басқалар есіріп кетеді. Ойынның интерактивті визуалды новеллаға келетін, әр түрлі аяғы бар.

Neva

Платформалар: Nintendo Switch, PlayStation 5, Xbox Series X|S

Егер сіз Хаяо Миядзакидің туындыларын жақсы көрсеңіз, Neva ойынын да ұнатуыңыз әбден мүмкін. Авторлар ойынды «Мононоке ханшайымы» фильмінен шабыт ала отырып әзірлеген екен. Ойыншы артынан сенімді серіктесі — қасқыр ерген, жас жауынгер қыздың рөлін сомдайды. Ойын махаббат, өзін-өзі тану, даму, сенім және батылдық тақырыптарын ашады. Сондай-ақ графикасының әдемілігі соншалық, сатылары Pinterest желісіндегі еркін суретшілердің туындыларынан аумай жатады.

Harold Halibut

Платформалар: Windows, Xbox Series X|S, PlayStation 5

Кадрлық анимация — жоғалуға жақын тұрған өнер түрі. Қымбат әрі тым көп еңбекті қажет ететін өнер. Өндіріс циклі одан да ұзақ видео ойындар саласы туралы айтпай-ақ та қояйық. Дегенмен он жылда бір рет Harold Halibut сынды ерекше жобалар пайда болып тұрады. Шынында Harold Halibut ойынын жасауға дәл 10 жыл кеткен екен. Әзірлеушілер бос уақытында айналысқан идеядан басталған бұл жоба уақыт өте келе толыққанды ойынға айналды. Кейіпкерлер, объектілер, қоршаған орта — бәрі қолдан саздан, матадан, пісірлген металлдан, өңделген ағаштан жасалып, Unity-дің көмегімен сканерленген. Кей сыншылар ойынды бірсарынды деп атап жатады. Алайда олардың сөзіне құлақ аспай-ақ қоюға болады, өйткені бәрінен бұрын бұл видео ойын — визуалды тәжірибе.

SCHiM

Платформалар: Windows, Xbox Series X|S, PlayStation 5, Nintendo Switch

Жинағымызды SCHiM атты ғажап ойынмен аяқтаймыз. Өзі қарапайым — Шхим есімді кіп-кішкентай жан иесін басқарып, бір көлеңкеден екінші көлеңкеге секіру керек. Мұны жүзеге асыру ойын әлемі қозғалыссыз тұрғанда оңай болғанымен, автомобильдер мен жануарлар сияқты қозғалыстағы объектілер енгенде ойыншыға қолдың ептілігі қажет бола бастайды. Ойын, әсіресе оның француз аниматорлары стиліндегі монохромды графикасы, адамды лезде арбап алады.