Шугейз, пост-панк, хип-хоп және альтернатива: қазақстандық орындаушылардың жаңа толқыны
Скриптониттің орындау мәнерін қайталамаған адам қалмады, Димаш Құдайбергеннің «құдай берген» даусы туралы бүкіл әлем біледі, ал «қазақстандық эстрада королі» Қайрат Нұртас көпшілікке онсыз да таныс. Бірақ бұл мақаладағы әңгіме олар жайлы емес. Шығармашылық жолының басында тұрған, бірақ батылдығымен, дарынымен және ерекше музыкалық талғамымен тыңдарман жүрегін баурап үлгерген қазақстандық орындаушылардың жаңа толқыны жайлы әңгімелейміз.
TRIPPLEHAZE
TRIPPLEHAZE – музыкант Алмас Шаяхметовтің жобасы. Ол шугейз, драм-н-бейс, витч-хаус, альтернатива, нойз-рок және өзге жанрларды тоғыстырған әуезді әрі сан қырлы шығармаларымен ерекшеленеді. Жақында TRIPPLEHAZE-дің HEAVENHUB атты 14 тректен тұратын жаңа альбомы жарық көрді. Стриминг платформаларындағы композициялардан бөлек, Алмастың шығармашылығы мен ой-толғауларын оның Telegram-арнасынан табуға болады. Сонымен қатар музыкант EARCRUSHER667 атты электронды сайд-проектімен де айналысып жүр.
AQQUYM
Бұл – қазақстандық музыка кеңістігінде бұрын-соңды болмаған қараңғы, эксперименталды және авангардтық жоба. Вокалы толықтай қазақ тілінде. AQQUYM-ның шығармашылығында Bladee, Yung Lean және басқа да «сэдбойлардың» әсері байқалады. 2024 жылдың қараша айында орындаушының IV line атты алғашқы альбомы жарық көрді. Оған: alda arttA, bla Bla, KÖRIP KEL, QYZYL TAMSHY, TIRI ØLIK, BAR BOLGANYMMEN және GUITA SKR атты жеті трек енген.