Желтоқсан және қаңтар айларында Алматы мен Астанада өтетін концерттер және басқа да іс-шаралар туралы әңгімелейміз.
Мейлі, заманауи өнер, мейлі, атақты дирижёрлер мен пианистердің музыка кештері болсын, желтоқсан концерттерге, қойылымдарға және басқа да мәдени іс-шараларға бай. Көп болғаны соншалық, қайсысына барарымызды білмей дал боламыз. Мейрам кезінде тамашалауға болатын қызықтар туралы әңгімелейміз.
Сондай-ақ «Жаңғақшаққыш» туралы дайындаған гайдымызға көз жүгіртіп, Қазақстан бойынша өтетін іс-шаралармен таныс болыңыз.
Саян Байғалиевтің Matte(r)reality көрмесі (Алматы)
Саян Байғалиевтің 27 желтоқсан күні өз мәресіне жететін, Matte(r)reality атты жеке көрмесін тамашалауға әлі де уақыт бар. Әбілхан Қастеев атындағы Қазақстан Республикасының Мемлекеттік өнер мұражайында өтіп жатыр. Жас қазақстандық суретші әрі мүсіншінің экспозициясы жарқын натюрморттарды, сюрреалистік композицияларды, экспрессивті түрде деформацияланған интерьерлерді және визуалды иллюзияларды қамтиды. Көрме кураторы — арт-кеңесші Владислав Слудский.
«Қағаз көрмесі» (Алматы)
19 желтоқсан күні Egin Art Space алаңында «Қағаз көрмесінің» ашылу салтанаты өтті. Көрмеде жартылай не толығымен қағаздан жасалған өнер туындылары ілінген. Топтық жобаға 26 адам қатысқан болатын. Арасында өнер жолына енді ғана қадам басқан суретшілер де, танымал шеберлер де бар. Ерекше іс-шара қаңтардың 26-на дейін өтеді.