Hublot бренді жыл сайынғы Essential сериясын дамытуды дәстүрге айналдырған. Биыл бұл топтама бесінші моделімен – Spirit of Big Bang Essential Taupe сағатымен толықты. Essential топтамасының бұған дейінгі нұсқалары секілді, бұл жаңалық та тек онлайн сатылым арқылы қолжетімді. Ол бөлшек сауда дүкендеріне түспейтіндіктен, коллекциялық құндылығы жоғары: әр модельдің тиражы небәрі 200 данамен шектелген.
Essential сериясының тарихы 2022 жылы Big Bang Unico Essential Grey моделінен бастау алған еді. Содан бері бренд жыл сайын бір модельден қосып, монохромды топтамасын ұлғайтып келеді. Мысалы, 2025 жылы Classic Fusion Essential Taupe моделінде тауп (taupe) түсі алғаш рет қолданылса, биыл бренд бұл ерекше реңкті Spirit of Big Bang корпусында қайта жаңғыртты. Осылайша, Hublot-ның бейтарап түстерге негізделген топтамасы бүгінде бес модельді құрап отыр.
Жаңа сағаттың дизайны екі түрлі өлшемде ұсынылған: 42 мм және 32 мм. Екі модель де тауп түсті корпуспен, циферблатпен және баулармен үйлесім тауып, бір-бірін толықтырып тұр.
42 мм өлшеміндегі нұсқасы қылқаламмен өңделіп, жылтыратылған титаннан жасалған. Оның циферблаты соғылған карбоннан тұрады, ал жылтыр және өңделген шаршылардың алма-кезек орналасуы сағаттың тереңдігін айшықтайды. Сағат техникалық жағынан да өте қуатты болып шықты: ішінде HUB4700 өздігінен жүретін механизмі мен ішкі құрылымы ашық (скелетон) хронографы орналасқан; қуат қоры 50 сағатқа жетеді.
32 мм нұсқасына келсек, сатылы және жылтыратылған тот баспайтын болаттан жасалып, күн сәулесі түріндегі гильоше өрнегімен безендірілген. Spirit of Big Bang топтамасының тарихында бұл модель – бриллиантсыз ұсынылған алғашқы 32 мм-лік сағат. Ол HUB1120 өздігінен жүретін механизмімен жабдықталып 40 сағаттық қуат қорына ие.
Әрбір модель екі ауыстырмалы баумен жүреді: біреуі – каучуктан, ал екіншісі – Velcro ілгегі бар матадан жасалған бау. Сондай-ақ Hublot өз тұтынушыларына қамқорлық танытып, жаңартылған кепілдік саясатын ұсынып отыр. Бастапқы бес жылдық кепілдікке Hublotista бағдарламасына тіркелу арқылы тағы бес жыл қосып, кепілдік мерзімін он жылға дейін ұзартуға болады.