Cartier сән үйі өзінің ең танымал топтамасының тарихын жалғастырып, жаңа LOVE Unlimited әшекейлерін ұсынды: алтын алқа, сондай-ақ гауһар тасты білезіктер мен жүзіктердің жаңа нұсқалары. Жарнамалық науқанның басты кейіпкері ретінде актер Джейкоб Элорди таңдалды.
Алтын шынжырлардан тұратын икемді алқа топтаманың басты жаңалығы болды. Оның буындарының арасына LOVE желісіне тән бұрандаларды орналастырған. Бұл әшекей қызғылт, сары және ақ алтыннан жасалған үш нұсқада шығады.
LOVE Unlimited білезігін де жаңа гауһар тасты нұсқамен толықтырды: үйреншікті бұрандалардың орнына жалпы салмағы 0,80 каратты құрайтын дөңгелек гауһар тастарды орнатты. Cartier әр тас үшін ақ алтыннан бұранда пішінді арнайы жиек жасаған — осы жиекті гауһардың жарқырауын күшейту үшін сары және қызғылт алтын білезіктерде де қолданды.
Қарапайым болып көрінгенімен, бұл әшекейлердің артында күрделі жұмыс тұр: бір білезік немесе алқаны жасау үшін шеберлер 200-ге жуық ұсақ бөлшекті біріктіріп, әрқайсысын қолмен мұқият жылтыратады. Білезіктерге жасырын ілгек те қосқан — соның арқасында бірнеше LOVE Unlimited әшекейін өзара біріктіріп тағуға болады.
LOVE тарихы 1969 жылы Нью-Йоркте басталды — сол кезде дизайнер Альдо Чипулло бұрандалары бар атақты білезікті ойлап тапты. Арада жарты ғасырдан астам уақыт өтсе де, бұл мотив әлі күнге дейін Cartier сән үйінің басты кодтарының бірі болып қалып отыр.
Сән үйі LOVE тарихының жаңа тарауын Парижде арнайы түсірілген науқанмен атап өтті: басты рөлде — Джейкоб Элорди, ал фотосуреттерді оның қарындасы Изабель Элорди түсірді.
