Bvlgari Үйі Алматыға бағалы тастармен көмкерілген әсерлі Serpenti топтамасынан бастап, антикалық тиындары бар Monete әшекейлеріне дейінгі ең айтулы туындыларын әкелді. Қонақтар оларды мұражай ішінде ерекше ықыласпен тамашалады: мұндағы әр витринаның алдында ұзақ тұрып, әр бөлшекке үңіле қарағың келеді.
Мұражай кеңістігінің өзі ерекше әсерге бөледі. Ол заманауи өнерде өзіндік қолтаңбасы бар Bvlgari стилінің мәнін аша түсіп, зергерлік топтамалармен керемет үйлесім тапты. Актриса Әсел Сағатова әшекейлердің көрмемен қаншалықты жарасқанын айтып берді:
«Бұл кеште арт-мұражайдағы өнерді де, әшекейлерді де, адамдарды да сүйсініп тамашалағың келеді. Bvlgari мұражай кеңістігін керемет пайдалана білген, гауһар тастардың жарқырауы көрменің табиғи жалғасындай көрінді. Жақын адамдар арасындағы жайлы кеш, әдемі меймандар және айналаңдағы сұлулықтың көптігінен басың айналатын сирек көңіл-күй. Өзімді бір сәтке өнер туындысының ішінде қалғандай сезіммен қайттым».
Опера әншісі Әйгерім Шәріпбек те кештен алған әсерімен бөлісті:
«Маған әсіресе әр бөлшегіне дейін ойластырылған талғампаз әрі эстетикаға толы орта қатты ұнады. Қонақтардың Almaty Museum of Arts директорымен бірге жаңа көрмені аралап шығуы — таптырмас мүмкіндік. Бұл өнер әлеміне жасалған шынайы танымдық әрі шабыттандыратын саяхат болды».
Кеш қонақтарына әдемі көңіл-күй сыйлаған опера әншісі Мария Мудряк Верди, Ардити және Пуччинидің арияларын орындады.
«Бұл барлық жағынан тамаша кеш болды. Зергерлік өнер мен музыка классикасы бір-біріне қатты ұқсайды. Екеуінің де негізінде табиғи сұлулық жатыр, ал қажырлы еңбектің арқасында ол одан сайын жарқырап, адамдарға ұмытылмас әсер сыйлайды! Гаухар мен Айжан (Гаухар Абыкаева мен Айжан Тұңғышбаева, Sansi-Bvlgari. – Tatler) және Римнен келген Bvlgari командасы қонақтарға ғажайып кеш тарту етті».
Кеш қонақтарының қатарында мұражайдың негізін қалаған Смағұловтар отбасынан Мадина мен Ақжан, саясаттанушы Досым Сәтпаев және оның жұбайы, мұражайдың коммуникациялар және фандрейзинг жөніндегі директоры Гаухар Сәтпаева, әнші Ерке Есмахан мен музыкант RaiM болды. Сонымен қатар іс-шараға опера әншісі Әйгерім Шәріпбек, актриса Әсел Сағатова, «Сәби» қайырымдылық қорының негізін қалаушы Әсел Тасмағамбетова және оның қызы, қоюшы-суретші әрі сценограф Софья Тасмағамбетова, Абай атындағы Қазақ ұлттық опера және балет театрының директоры Айнұр Көпбасарова қатысты.
