Үйдегі отырыстардан бастап, театрдағы маңғаз кештерге дейін не киіп баруға болатыны жайлы кеңестер топтамасын дайындадық
Жаңа жыл жақындаған сайын мереке қарсаңындағы түрлі жиын-тойға не киіп барсам деген сұрақ мазалап, ойша гардеробты мың ақтарып тастайтынымыз бар. Құрбы-құрдас, дос-жаран алдында жарқ еткен образбен есте қалғыңыз келеді ғой. Кішігірім караокеге барсаңыз да, ақсүйектердің салтанатты кешіне жиналсаңыз да, мақсат біреу — мінсіз болу. Ондайда біреулер қарапайым ғана сәнді қара көйлегін іле салса, енді біреулер тәуекелге бел буып, жұрт талқысының басты тақырыбына айналатын образды таңдайды.
«Щелкунчик» балетіне бара қалсаңыз:
Таңдауыңыз бен талабыңыз Black Tie болса, шашауын шығармай, «ғажап» сөзіне синоним бола қалу үшін төмендегі образдарға назар аударыңыз. Сәнді ұзын көйлек киіп шыққыңыз келсе, Saint Laurent-ның femme fatale стиліндегі ұзын қолғабы бар көйлектер ерекше әсер қалдырады. Егер жеңіл әрі нәзік көрінгіңіз келсе, Victoria Beckham-ның көйлегі сізге құйып қойғандай жараса кетуі бек мүмкін. Сәл батылырақ қадамға барғыңыз келсе, Bottega Veneta-ның қызыл түсті, етегі қалың шашақты лапылдап жанған жалын тектес көйлегі кім-кімді де бей-жай қалдырмасы хақ.
Коктейль кешіне баратын болсаңыз:
Биыл батыл жандар коктейль кешіне іш киім стиліндегі көйлекпен барса, әбестік болмайды. Шаламөлдір маталар мен винтажды іш киім стиліндегі көйлектер трендке шықты. Соның ішінде Jean Paul Gaultier-нің жалаңаш дене иллюзиясымен үндес тромплёй принті бар «мөлдір» көйлегіне таңдауымыз түсіп отыр.
Ал ультра-сексуалды образ үшін Saint Laurent-ның мини-көйлекті шұлық бауымен үйлестіруі тамаша шешім секілді. Бұдан да жарқын образды қажет етсеңіз, Rabanne-нің әйгілі сақинамен өрілген мини-көйлегі көңіліңізден шығатынына сенімдіміз.
Үйдегі караоке кешіне не кием десеңіз:
Караокенің түбін түсірмесеңіз де, кештің көркі етер образдар бар. Мәселен, Malli-дің жібек корсетін киіп, өзіңізді будуар жұлдызындай сезініңіз. Ал Loewe-ның атлас көйлегін киген бикеш қолына шампан алып, қызыл кілемде селебритилерше жарқырап жүрері сөзсіз. Nicklas Skovgaard-тың жылтырақпен сәнделген жібек көйлегін киген сұлудың көркі жарықшаммен көмкерілген шыршадан да асып түсері анық.
