Saltburn, фронт роудағы рыцарь және «ғасырдан ғасырға жететін» сырт киім сөздерімен сипаттауға болатын Burberry-дің 2025 жылғы күз-қыс коллекциясы жалпы қалай болды?
London Fashion Week сырт киімдерімен көзге түскен тұтас Burberry коллекциясымен тәмамдалды. Креативті директор Дэниэл Ли ақырында «серпіліс алып», британ аристократиясынан шабыт ала отырып әзірленген, әсерлі коллекция ұсынды. Бұл дизайнердің Burberry-ге арнап әзірлеген соңғы көрсетілімі деген сөз де болды. Алайда бренд аясындағы болашағы жөнінде Дэниэл былай деді: «Бұл – ғажап бренд, Burberry-ге арнап жұмыс істегенімді абырой көремін».
Шоуға көптеген танымал тұлға қатысты. Алдыңғы қатарда Ким Кэтролл, Николас Холт және Орландо Блум сынды жұлдыздар болды. Алайда кештің басты жұлдызы атағын Burberry Prorsum рыцарі иемденді. Дизайнер оған Burberry креативті директоры лауазымына келе сала жан бітіріп, London in Love науқанының кейіпкеріне айналдырған болатын. Анна Винтурдың өзі сауыт киген рыцарьмен селфи жасаудан қалыс қалмады.
Коллекцияны британ аристократиясының еркін әрі жалқау, декаденттік пен оғаштыққа жақын өмірі туралы хикая деп сипаттауға болады. Бай болғанымен, әпенділеу отбасының британдық жер иелігіндегі өмірі туралы түсірілген, танымал Saltburn фильмінің сюжетіне ұқсас хикая. Дэниэл Йоркширдегі сарайлардың салтанатты интерьерлері мен қысқы пейзаждардан шабыт алған екен. Коллекцияда «ғасырдан ғасырға жететін» сырт киім, оның ішінде салтанатты жүн пальтолар, тері бомберлер және жер түстес тренчтер көп. Онда тартан, былғары, алтын патина, дамаск және гобелен сынды текстура да жетеді. Аса шығармашыл сілтемесі, артық бір мәні жоқ, адамға түсінікті киім.
Қиқарлы аристократия атмосферасын одан әрі күшейту үшін подиумға британдық жұлдыздар шықты. Арасынан Ричард И. Грантты (Saltburn фильмі мен соңғы Burberry науқанының жұлдызы), Лесли Мэнвиллды және Джейсон Айзексті (Люциус Малфой, The White Lotus сериалының жақында шыққан үшінші маусымына түскен актер) байқадық. Актерлер шақпақ шалбар, джодфур және барқыт смокингтерден тұратын образдарды сомдады. Киім киісіне қарап, оларды аң аулауға не Англияның ауылды жеріндегі қонақасына бара жатқан жандар деп қалуыңыз әбден мүмкін.