Guardian басылымының жазуынша, сымсыз AirPods пен оның баламалары үстемдік еткен заманда, кабельді классикалық гарнитура сәнді аксессуарға және саналы таңдаудың белгісіне айналды.
Сымдардың «ескіру» жолы 2016 жылы Apple компаниясының iPhone 7 моделінен 3,5 мм қосқышты алып тастауынан басталған еді. Одан кейін өзге брендтер де бұл үрдісті қолдап, джек-портты сирек кездесетін детальға айналдырды. Кабельдер дәуірі аяқталғандай көрінгенмен, 2025 жыл мұның керісінше екенін дәлелдеді.
Жаңа тренд сән үйлерінің көрсетілім залында емес, әлеуметтік желілер мен көшелерде дүниеге келді. Бұл қозғалыстың басты қозғаушы күші – нөлдік жылдардың (Y2K) эстетикасына ғашық болған «Z ұрпағы». TikTok пен Instagram желілерінде Дуа Липа, Белла Хадид және Зои Кравиц сынды жұлдыздар сымды құлаққаптармен жиі бой көрсетіп, оны «бейқам» немесе винтажды бейненің ажырамас бөлігіне айналдырды. Ультразаманауи смартфон мен қарапайым «сымдар» арасындағы контраст өзін-өзі танытудың жаңа формасына айналды.
Дегенмен, бұл сәннің артында прагматикалық есеп те жатыр. Ақылды гаджеттер әлемінде өскен ұрпақ «цифрлық шаршауды» көбірек сезіне бастады. Сымды құлаққаптар жастар жоғары бағалаған қарапайымдылықты ұсынады:
• Қуаттаудың қажеті жоқ: Олар құрылғыға қосылып тұрған кезде әрдайым жұмыс істей береді;
• Жоғалту қиын: Сымсыз «түйме-құлаққаптарға» қарағанда, олар әрқашан мойныңызда немесе көз алдыңызда болады;
• Сапа мен жылдамдық: Дыбыстың қысылмай жетуі және кідірістің болмауы аудиофильдер мен геймерлер үшін өте маңызды;
• Қолжетімділік: Көп жағдайда олар сымсыз баламаларынан бірнеше есе арзан тұрады.
Сарапшылар сымдардың қайта оралуын жай ғана ностальгия емес, гаджеттерді үнемі жаңартып тұруға мәжбүрлейтін тұтынушылық айналымға қарсы үнсіз наразылық деп есептейді. Сондай-ақ бұл – практикалық тиімділік пен саналы тұтынудың нышаны. Технологиялық алпауыттар сымсыз болашаққа бәс тігіп жатқанда, жас пайдаланушылар уақыт тезінен өткен классиканы таңдауда.