Salomon мен Maison Margiela, New Balance пен Miu Miu, AVAVAV пен adidas
Коллаборацияларды жаңашылдық емес, тиімді маркетинг тәсілі деген дұрыс. «Бір бастан гөрі екі бас жақсы» дегендей, эксперименталды серіктестіктерден бірегей коллекциялар туады. Бірі жұртты Rolex пен Domino’s сияқты таң қалдырса, екіншісі жаңа дарындарды табуға мүмкіндік ашады, ал үшіншісі табысты бизнес стратегиясына айналады. Соңғы кейстердің арасынан Nike мен SKIMS-тің коллаборациясы көзге түседі. Бұл серіктестік спорттық брендтің акцияларын қымбаттата түскен екен. Редакциямыз табыс сыры сапалы серіктестікте деп біледі. Бірнеше сәнді коллаборациялардан тұратын топтама жинадық.
Salomon x MM6 Maison Margiela
Спорт жоғары сән әлемінің есігін теуіп кірді. Коллаборация табаны жалпақ, түрлі-түсті Мэри Джейн туфлиі, баусыз кроссовка, логомания және сірісі қысқартылған аяқ киімнен тұрады.
New Balance x Miu Miu 530 SL Mules
Алды – кроссовка, арты – резеңке шақай. New Balance пен Miu Miu-дің коллаборациясы әсемдік және ұсқынсыздық стандарттарының астан-кестенін шығарады. Үйлесімі жасанды әрі тиімсіз мюль наразылық акциясына ұқсайды.
AVAVAV x adidas
Флоренциялық AVAVAV бренді экология тұрғысынан таза өндірісімен және «есуас» дизайнымен ерекшеленеді (құбыжықтың табаны пішініндегі тобықты етікті еске алайық!). Adidas-пен бірге жасаған коллаборациясы аясында бренд етегі жерге дейін жететін күрте мен болеро, кең жиекті кепка, «төрт саусақты» аяқ киім және көлемді қолғап ұсынды. Спортпен айналысатын киімге аз ұқсайды. Ұраны да өзіне жарасымды: «Тарихтағы ең нашар ойын».
Pleasing x JW Anderson
Әнші Гарри Стайлз бен дизайнер Джонатан Уильям Андерсонның коллаборациясы. Pleasing брендінің еркіндік пен шаттық ұғымдарына негізделген концепциясы жаңа коллекциядан көрініс тапты. Жаңашыл әрі арандатушы өнім болып шықты. Коллекция аясында унисекс киімге салынған жарқын принттер, сөмкеге ілуге арналған еркектің жыныс мүшесі пішініндегі салпыншақтар және бірегей тырнаққа арналған лак палитрасы ұсынылды.
Off-White x Jimmy Choo
Коллекцияда биік өкшелі көпірме етік, су өткізбейтін тобықты етік және пластикпен қапталған туфли бар. Дизайнер әрі Off-White брендінің негізін қалаушы Вирджил Абло Диана ханшайым мен Англияның ауа райынан шабыт алса, біз оның Jimmy Choo-мен бірге жасаған коллаборациясына қарап шабыттанып, көктемгі образ құруға кірісеміз. Су өткізбейтін аяқ киім жарар еді. Бахиладан қайран жоқ.
