Жаңа маусым сияқты, Дженна Ортеганың стилі де барған сайын күңгірттеніп, күрделене түсуде
«Қарадан да қою түс ойлап тапқанда ғана мен қара киюді доғарамын», – дейтін Уэнсдей Аддамс. «Wednesday» сериалының екінші маусымының пресс-туры кезінде Дженна Ортега оның бұл сертін бұзғанымен, образға қажетті күңгірттікті сақтап қалды. Ағартылған қастар, драмаға толы қою еріндер және ұстараның жүзіндей өткір бет сүйектері – актриса Уэнсдей есімді қыздың хикаясын танымал және таңдаулы брендтердің киімдерімен насихаттап жүр.
Оның стилисі Энрике Мелендес подиумдағы дайын жиынтықтарды тікелей көшіруден аулақ, ол брендтер мен көңіл-күйді араластыруды жөн көреді. Ол мексикалық эпатажды дизайнер Willy Chavarria-ны классикалық Christian Louboutin-мен, Ann Demeulemeester-дің күңгірт романтикасын авангардты Miista аяқ киімімен үйлестіреді. Біз Дженна Ортеганың стилі қалайша жаңа, жыртқышқа тән жылтырға ие болғанын көру үшін турдағы ең ерекше образдарды жинадық.
Лондондағы Вестминстер Сентрал-холлында өткен әлемдік премьерада
Лондондағы премьераға Ортега Ashi Studio-ның латекс көйлегімен шықты. Ол терісін тастап, «Уэнсдейдің» екінші маусымын жаңа кейіпте бастауға дайын тұрған сәнді рептилия іспетті болды.
Лондондағы Корольдік опера театрында өткен афтепатиде
Афтепатиге Ортега винтажды ашықхаттан түскендей бейнеде келді: DKNY-дың 2004 жылғы топтамасынан алынған шампан түстес жібек комбинация, Santoni туфлиі және Kurt Geiger клатчы.
Le Beach Club de Mercredi, Париж
Сена жағалауында нағыз викториандық драма өрбіді: Ортега Андреас Кронталер жасаған Vivienne Westwood-тың 2025 жылғы күзгі топтамасынан алынған рюшті жібек комбинация киіп, өзін жын-шайтаннан қорғайтын ірі крест тақты.
Лондондағы Netflix фотоколлында
Ортега Сара Бертон жасаған Givenchy-дің готикалық мінсіз бейнесінде суретке түсті: қарындаш-белдемшемен үйлескен конус пішінді былғары бра, массивті қолғаптар және шынжырлы білезіктер.
Нью-Йорктегі Хадсон-Скверде өткен Good Morning America шоуында
Таңғы шоуға Ортега Willy Chavarria костюмін киіп келді: қарындаш-белдемше және иықтары үшкір блейзер. Бейнені Christian Louboutin туфлиі мен жалпақ жиекті қалпақ толықтырды.
Нью йорк
Нью-Йоркте Ортега постиндустриалды романтика лебі ескен Elena Velez корсетті көйлегімен шықты. Образды UNOde50 шынжырлы сақинасы және бағасы жақсы көлікпен пара-пар – 100 000 доллар тұратын Aupen сөмкесі толықтырды.
Нью-Йорктегі Манхэттенде орналасқан Paris театрындағы арнайы көрсетілімде
Нью-Йорктегі арнайы көрсетілім үшін Энрике Ортеганы Ann Demeulemeester-ге тән дәстүрлі күңгірт элеганттылыққа киіндірді. Толған айдың астындағы салтанатты кешке арнап тігілгендей, ретсіз жиырылған жібек пен тіліктері бар қара көйлекті танкеткалы массивті Miista бәтеңкелері толықтырды.
Сеулдағы Four Seasons қонақүйінде өткен баспасөз мәслихатында
Сеулда Дженна Simone Rocha-дан елес-бейне салынған боди мен көпқабатты белдемше киіп, кішкентай мыстан кемпірді еске салды.
Сеулдағы Netflix фотоколлында
Фотоколл үшін Дженна Dilara Fındıkoğlu брендінің баулы корсеті, үшкір иықтары мен қарындаш-белдемшесі бар қара лакталған көйлегін таңдады, ал қағаз қолшатыр бейненің әсерлі соңғы нүктесі болды.
Сиднейдегі Кокату аралында өткен іс-шарада
Сиднейде стилист Круэлла де Вильден шабыттанып, актрисаны Valentino-дан ақ-қара түсті тон мен баулы Miista етігіне киіндірді.
