Pitti Uomo – ерлер сәніне арналған әлемдегі ең ірі халықаралық көрме. Жылына екі рет ұйымдастырылатын бұл шара жаңа сән маусымының бағыт-бағдарын айқындап береді. 13-16 қаңтар аралығында Fortezza da Basso қамалының павильондарында 700-ден астам халықаралық бренд өздерінің жаңа топтамаларын таныстырып жатыр.
Бұл көрменің бір ерекшелігі – жұртшылықтың назары тек павильон ішіндегі ресми көрсетілімдерге ғана емес, сырттағы еркін шеруге де ауады. Pitti Uomo өтіп жатқан күндері Флоренция көшелері нағыз «жанды подиумға» айналады. Көрмеге келген қонақтардың өзі стрит-стайл фотошежіресінің басты кейіпкерлеріне айналып шыға келеді. Олардың киім киісі – италиялық талғампаз классика мен батыл эксперименттердің тоғысқан жері. Дәл осы бейнелер жүздеген фотографтар мен сән редакторларының объективіне ілігіп, әлемдік назарға ие болады. Көбіне Fortezza da Basso маңындағы көшелерде байқалған осы киім үлгілері кейін әлеуметтік желілерде кең тарап, жаңа маусымның басты трендтерін қалыптастырады.
Биылғы тенденцияларға сүйенсек, қоңыр түстің барлық реңктері, түрлі өрнектермен көмкерілген трикотаж бұйымдары, мойынға тағылатын шарфтар мен орамалдар, сондай-ақ «Peaky Blinders» стиліндегі кепкалар нағыз сәнге айналған.
Біз сіздер үшін Pitti Uomo 2026 көрмесінің ең таңдаулы бейнелерін жинақтадық.
