Люкс сыртқы киім шығаратын италиялық Moncler бренді Re/Icons 2026 жобасын іске қосты: бұл ауқымды науқанға үш дәуірдің танымал әйелдері бас қосты. Жобаға BLACKPINK тобының әншісі Дженни, сондай-ақ аты аңызға айналған Шер мен Грейс Джонс қатысты. Науқанның өзегінде – жаңашылдық пен батылдық идеясы жатыр. Науқан марканың тау шыңдарын бағындырған кезеңіндегі бай тарихи мұрасын қазіргі поп-мәдениеттің жарқын бейнелерімен тамаша үндестіреді.
Жобаның визуалдық бөлігіне танымал британдық фотограф әрі режиссер Габриэль Мозес жауап берді. Ол әрбір кейіпкер үшін қайталанбас, өзіне ғана тән концептуалды эстетика жасап шыққан.
Дженни камера алдына аты аңызға айналған қара Karakorum күртешесін, Nylon Laqué нейлонынан тігілген мамық белдемшені, сондай-ақ тоқылған жоғарғы киім мен балаклаваны киіп шығып, көпшіліктің назарын өзіне аударды. Оған қоса ол карамель реңкіндегі Tibb кеудешесін де киді. Суреттерде әнші қарбалас тобырдың ортасында тұрса да, жаңа буынның басты жұлдызы ретінде бірден көзге түседі.
Шер крем реңкті, капюшонды Himalaya мамық күртешесімен және жібек орамалмен көрінді – бұл образ әншінің тарихта қалған сахналық бейнелерін еске салады.
Ал Грейс Джонс болса күлгін түсті Karakorum күртешесін киіп, өзінен аумайтын көшірмелерінің ортасында тұрып суретке түскен. Бұл шешім арқылы ол суретші Жан-Поль Гудпен бірге жасаған әйгілі авангардтық жобаларына ерекше құрмет көрсетті.
«Ең асқақ арманым – өзім әлі танып-біліп үлгермеген ішкі қырларымды, жаңа болмысымды аша түсу. Еш шектеусіз шығармашылықпен айналысудан, жаңа дүниелерді байқап көруден және үлкен белестерді бағындыруды армандаудан ешқашан жалықпаймын»,
Re/Icons 2026 топтамасында бренд өз тарихи үлгілерін қайта ойластырған. Олардың арасында атақты француз альпинисі Лионель Терраймен бірге жасалған 1950-жылдардағы экспедициялық жабдықтар мен 1980-жылдардың жарқын визит карточкасына айналған бұйымдар бар.
Жаңа желінің қатарын Karakorum, Verone, Himalaya және Tibb күртешелерінің жаңартылған нұсқалары толықтырды. Олармен бірге желқағарлар, футболкалар, шалбарлар, белдемшелер, бас киімдер мен жібек твилден тоқылған орамалдар таныстырылды. Топтаманың басты акценті – винтажды альпинистік маскалардан шабыт алған, титан мен былғарыдан жасалған арнайы көзілдіріктер.
Moncler өкілдері атап өткендей, жарнамалық науқан кейіпкерлері бай тарихы бар бұйымдарды бірегейліктің, асқақ амбицияның және толассыз мәдени ықпалдың символына айналдырып отыр.