Джон Туртурро, дизайнерлердің үйлену тойы және Prada: Милан сән апталығы тағы несімен есте қалды?
Миланда 2025 жылдың күз-қыс маусымына арналған ерлер киімінің сән апталығы өтті. АҚШ президенті Трамптың инаугурациясымен қатар өткен іс-шарада италиялық дизайнерлер ерлер киімі дизайнының болашағын көрсеткен таңдаулы топтамаларын ұсынды. Ел-жұрттың назары әсіресе Prada сән көрсетіліміне ауды. Оған шақырту ерекше түрде жасалып, әр қонаққа металл түтікше берілді. Ал Zegna көрсетілімінде көрермендерді әйгілі «Severance» сериалының актері Джон Туртурро (Ирвинг) таң қалдырды. Ол ол ма, дизайнерлер Джордан Боуэн мен Лука Маркетто сенсация жасады. Жас жұбайлар некелерін дәл подиумда тұрып қиды.
Миланнан Парижге жол тартқан сән басылымдары, инфлюенсерлер мен сатып алушылар легі арасында таңдаулы топтамаларға көз жүгіртіп шығыңыз.
Prada
Миучча Прада мен Раф Симонс жаңа топтамада адамның табиғаты мен негізгі инстинктілерін зерттеген сияқты. Көрерменге аңшылардың трофейлерін еске түсіретін пальто мен жилеттегі өңделмеген терілер примитивизмнен хабар беріп тұрды. Кең иық пен нақты сызықтары бар силуэттер өзінше бір батылдыққа басымдық бергендей. Коллекцияда қолданылған тері алғашқы қауымдық адамды еске түсіріп, оны заманауи Prada стиліне бейімдегендей болды.
Ковбой образы коллекцияның негізгі элементіне айналған, бірақ нақты кинокейіпкерлерге сілтеме жасалмаған. Раф бұл жерде көрерменге өз интерпретациясын жасауға мүмкіндік берген сияқты. Топтамадағы ерекше бойтұмар тәрізді әшекейлер: зәкір тастары, беде жапырақтары және баскетбол доптары ерекше назар аудартады. Олар, бәлкім, ырымшыл адамдар үшін талисманға да айналуы мүмкін.
Айта кететін тағы бір жайт, Prada сән көрсетіліміне қазақстандық модель Әли Данияров қатысты.
Zegna
Zegna брендінің философиясы Италияның Sprezzatura ұғымына негізделеді. Мағынасы «мұқият ойластырылған бейқамдық» дегенге саяды. Креативті директор Алессандро Сартори осы философияны жаңа топтамада асқан шеберлікпен көрсете білген. Кең пішімді шалбармен үйлескен классикалық жүн костюмдер уақыт сынынан өтіп, өзектілігін еш жоғалтпағандай әсер қалдырады.
«Мен адамның ұзақ жылдар бойы жинақтаған гардеробын елестеттім. Ондағы әр зат материалдық және эмоционалдық құндылыққа ие. Біз киімге өмір тарихын сіңіру үшін қайнатылған жүн мен Vellus Aureum (Алтын руно) сияқты материалдарды қолдандық», – дейді Сартори.
Топтаманың идеясына өмірлік тәжірибесі бар модельдерді таңдау шарты қойылды. Соған орай шоудың басты жұлдызы ретінде актер Джон Туртурро көптің көзайымына айналды. Бұл топтама киім кию мәдениетін мінезбен және даралықпен үйлестіре білудің ең жарқын мысалына айналды.
Dolce & Gabbana
Dolce & Gabbana топтамасы италиялық режиссер Федерико Феллинидің «Тәтті өмір» (La Dolce Vita) фильмінен шабыт алған. Модельдер папараццилер қоршаған подиумда дефиле көрсетті, бұл италиялық кинематографияның алтын дәуіріне жоғары ілтипаты ретінде қабылданды.
Топтама сән мен күнделікті стильдің дуэтін шебер көрсете алған. Бай тондар қарапайым джинстар және ақ жейделермен үйлесіп, заманауи жұлдыздардың өмірін еске салды. Ал мінсіз пішілген қос қабатты костюмдер Dolce & Gabbana қолтаңбасына тән классикалық стильді паш етті.
Emporio Armani Menswear Fall Winter 2025
Seductive (Тартымды) – Emporio Armani топтамасының атауы. «Тартымдылық – өзгелерді өзіне баураудың ерекше өнері. Ол сөзден, қимылдан және стильден көрініс табады», – деп жазылды көрсетілімге арналған ақпаратта. Emporio Armani бренді жас әрі талғампаз аудиторияға бағытталған. Топтамада сапалы тері мен жүн сияқты материалдардан тігілген киімдер ұсынылған. Кешкі және күнделікті стильдегі киімдер табак, шоколад сияқты қою реңктермен әрленген. Шоудың ерекше бөлімі – модельдердің қарлы боран дыбысының аясында жасыл, қызғылт, күлгін және қоңыр түстегі жарқын мамық күрткелер мен тренчтерді көрсетуі болды. Emporio Armani суық мезгілдің мың бояулы сәнін жаңа қырынан аша алды.
Simon Cracker
Simon Cracker бренді жаңа топтамасында сән индустриясындағы люкске деген шектен тыс құмарлықты өткір сынға алды. Қайта өңделген материалдардан тігілген унисекс киімдер сәнді брендтерге, соның ішінде культке айналған Birkin сөмкесіне деген әуестікті әжуалады. Дизайнерлер сөмкенің танымал фурнитурасын былғары аксессуарларға бейнелеп, тіпті оны трикотаждан жасалған киімдерге де қолданды. Топтама үшін жұмыс істеліп жатқанда, Walmart дүкені де Birkin-ге пародия ретінде Wirkin сөмкесін шығарды. Бұл дизайнерлер Симоне Ботте мен Филиппо Бирагидің көңілінен шығып қана қоймай, шабыт сыйлай алған көрінеді. Сонымен қатар олар ұқыпты твид киім киіп, кішкентай итін қолтықтап жүретін дәстүрлі итальян әйелдерінің образындағы Sciura-ны сынап, өз туындыларын ұсынды.
Jordanluca
Jordanluca топтамасының басты тақырыбы – махаббат. «Махаббат – шынайы әрі өзгеріске бастайтын батыл қадам», – делінген көрсетілім жазбаларында. Топтама дизайнерлердің жақын достары мен әріптестері арқылы көрсетілді. Harris Tweed және Marton Mills маталарынан тігілген киімдер британдық стильдің мәнін толық аша түсті. Киімдерді безендіруде Стоунхендж, ағылшын бульдогтары және раушан гүлдері сияқты Ұлыбритания нышандары қолданылған. Модельдер қолында раушан гүлін ұстап жүрді, бұл махаббаттың символы ретінде қабылданды. Ал шоу шарықтау шегіне жеткенде, дизайнерлер Джордан Боуэн мен Лука Маркетто подиумда өздерінің некесін қиды. Бұл махаббат пен шығармашылықтың символдық көрінісіне айналды.
