Bvlgari көктем-жаз 2027 маусымына арналған былғары аксессуарлар топтамасын ұсынды. Сән үйі бұл жолы да зергерлік кодтарды сөмке дизайнына көшіру дәстүрін жалғастырды: Serpenti мен Tubogas жаңа пішін тапты, ал көпшілікке таныс модельдерге бағалы тастардың реңктерін және күрделі қолдан жасалған әрлеуді қосты. Кейбір сөмкелерге мыңдаған кристалл, інжу-маржан және жүздеген метр жіп жұмсап кесте салды.
Bvlgari мұрағатынан 1970 жылдары алғаш жарық көрген аты аңызға айналған Melone Clutch сөмкесін қайта әкелді. Дизайнерлер оның мүсіндік пішінін қауыннан алған — қауын молшылық пен өміршеңдіктің символы саналады. Жаңа клатчты алтын жалатылған бүрмелі алюминийден жасап, ақ перламутрден кабошон ілгек тақты. Жинаққа қара және піл сүйегі түстес екі ауыстырмалы жібек шашақ кіреді, ал қосымша тағы 12 түске тапсырыс беруге болады. Melone Clutch сатылымға 2026 жылдың қазан айында шығады.
Serpenti 1968 топтаманың басты жаңалықтарының бірі болды — дизайнерлер оны 1968 жылы шыққан Bvlgari зергерлік сағатынан шабыттанып жасаған. Бұл модельдің ізашары алғаш рет 2021 жылы Мэри Катранзумен бірлескен жобада пайда болған еді, енді міне, мүлдем жаңа сипатта қайта жаңғырды. Тұтқаның орнына мүсіндік металл жыланды орнатқан — осы бөлшек модельдің басты ерекшелігі. Қаласаңыз, жыланды алып тастап, орнына үлкен Cobra шынжырын тағуға да болады. Бұл сөмке 2027 жылдың ақпан айында сатылымға шығады.
Сән үйінің мұрағатынан тағы бір туынды тамыр тартты — Serpenti Harlequin сағатынан шабыт алған жүрек пішінді Serpenti Cuore 1968 сөмкесі. Оның жылан-тұтқасын қолмен эмальмен әрледі. Ақпан айында бұл модель Almandine Garnet және Pink Petalite реңктерінде шығады.
Кезекті жаңалық — Serpenti Cuoricino шағын клатчы. Алдымен Chalcedony Blue көгілдір реңкінде шығады, ал мамырда — Silver Neige Pavé Crystal атты кешкі нұсқасы қосылады. Бұл модель үшін Bvlgari арнайы тапсырыспен 4300-ден астам Swarovski кристалын дайындатты, ал шеберлер оны жинап болған соң мыңға жуығын қолмен мұқият бекітті.
Serpenti Forever желісін де елеулі жаңартты: қатарға нақты архитектуралық пішіндегі Medium Top Handle мен созылыңқы Medium Shoulder Bag қосылды. Elongated Top Handle Jadeite реңкінде қайта оралса, Mini Top Handle мен Day-to-Night үшін карунг су жыланының терісінен жасалған жаңа пастель түстерді таңдады.
Tubogas Sphere сөмкесі де Tubogas зергерлік кодын жалғастырады. Жаңа маусымда оны Almandine Garnet терең реңкіндегі бұзау терісінен тіккен, ал тұтқасының сфералық ұштарын жартылай мөлдір эмаль мен кристалды павемен безендірген — бұл бөлшектер 1970 жылдардағы Bvlgari эстетикасынан сыр шертеді.
Алайда топтамадағы ең таңғаларлық сандар қол еңбегімен байланысты. Бір ғана Serpenti Forever Mini Top Handle сөмкесінің Galaxy Crystals әрлеуіне шеберлер 28 реңктегі 15 000-нан астам кристалл жұмсап, 1900-ге жуығын қолмен бекітті.
Lotus Garden кестесі де дәл осындай қажырлы еңбекті талап етеді: оны жіптен, рафиядан, кристалдан және інжу-маржаннан тоқыған. Serpenti Forever Medium сөмкесін әрлеу үшін шеберлер шамамен 1100 кристалл мен інжу, 20 метр рафия жұмсап, 10 күн еңбектенді.
Топтамадағы нағыз рекорд Serpentine Tote моделіне тиесілі: оны тігу үшін шамамен 600 метр жіп пен 900 әшекей бөлшегі кетті, ал шеберлер кесте мен әрлеуге 15 күн жұмсады. Lotus Garden Embroidery үлгісіндегі модельдер 2027 жылдың сәуір айында сатылымға шығады.
