Он үшінші тамызда қазақстандық Malli бренді Алматыда өзінің жаңа кеңістігінің тұсауын кесті. Назарбаев даңғылы мен Қабанбай батыр көшесінің қиылысындағы, он жылдан астам уақыт бойы бренд табынушыларын қуантып келген атақты бутик бәріміздің есімізде. Айтпақшы, бұрынғы орнынан жолдың арғы бетіне ғана көшкен жаңа бутик әлдеқайда ауқымды әрі концептуалды бола түсті. Дегенмен ол өзінің ең басты құндылығын – Malli-дің танымал визуалды қолтаңбасы мен әрбір бөлшекке деген ерекше назарын сақтап қалды.
Интерьердің негізінде өткен мен бүгіннің үндестігі жатыр: мұнда ескі Алматының сәулеті, кеңестік монументалды өнердің эстетикасы мен заманауи дизайн мінсіз үйлесім тапқан. Дизайнның орталық мотиві ретінде жаратылыс идеясы мен Malli-дің басты кейіпкері – өз өмірінің сценарийін өзі жазатын тәуелсіз әйел бейнесі таңдалған.
Ашылу салтанаты Lancôme брендінің қолдауымен өтті: кеш бағдарламасы музыка, өнер және каллиграфиямен өріліп, ал кеңістіктің жекелеген бөлшектері Malli × Lancôme коллаборациясына арналды.
Жалпы алғанда, жаңа мекенжай жай ғана шопинг жасайтын орын ретінде ойластырылмаған. Бренд командасы бұл орталықты кездесулер, шығармашылық пен жаңа жобалар туындайтын арнайы кеңістік, сондай-ақ Алматы картасындағы тағы бір маңызды нүкте ретінде көреді.
