Atelier Versace киген Энн Хэтэуэй
Энди Сакс рөлін сомдаған актриса Atelier Versace брендінің көз тартарлық көйлегін таңдады. Брендке тән классикалық драмалық силуэт пен мінсіз пішім образға нағыз киноға тән әр беріп, оның гламурлық сипатын айшықтай түсті. Айтпақшы, Лондондағы премьераға былтыр Versace креативті директоры қызметінен кетіп, қазір брендтің амбассадоры атанған Донателла Версаче де келді.
Ал A Night With Runway гала-кеші үшін Энн арнайы тігілген Louis Vuitton көйлегін киіп, образын өзгертті.
Prada киген Мэрил Стрип
Ойдан шығарылған Runway сән журналының бас редакторы Миранда Пристлидің рөлін орындаушысы бұл жолы Prada брендін таңдады. Мұндай таңдау актрисаның образына да, бүкіл франшизаға да үлкен символдық мән береді. Ол қолына Runway журналының шағын нұсқасына ұқсайтын клатч ұстап шықты. Айта кетейік, бұл кейіпкерге америкалық Vogue басылымының бас редакторы Анна Винтурдың бейнесі негіз болған деседі.
Арнайы тігілген Balenciaga көйлегіндегі Эмили Блант
Эмили Блант қызыл кілемге арнайы тігілген Balenciaga образында шығып, көйлектің құрылымды пішімі мен Пьерпаоло Пиччолидің қолтаңбасына тән эстетиканы таңдады. ВВС арнасына берген сұхбатында актриса Миранда Пристлидің бұрынғы көмекшісі Эмилидің рөліне қайта оралу «ешқандай қиындық тудырмағанын, бейне бір ескі тәпішкесін қайта кигендей күйде болғанын» айтты.
Кейінірек, A Night With Runway гала-кешінде актриса Джонатан Андерсонның дебюттік кутюр топтамасындағы Dior көйлегін киді.
Mugler көйлегін киген Симон Эшли
Симон Эшли The Devil Wears Prada 2 фильмінде Миранда Пристлидің командасында жұмыс істейтін жас редакция қызметкерін – Runway-дің жаңа кейіпкерін сомдайды. Лондондағы премьера үшін Эшли Mugler көйлегін таңдады.
Ал Стэнли Туччи Paul Smith костюмін киіп келді
Актер талғампаз Paul Smith костюмін таңдап, премьераның көркін байсалды британиялық классикамен толықтырды. Оның жанында жұбайы, актриса Эмили Бланттың әпкесі Фелисити болды. Туччи мен Фелисити 2010 жылы Эмилидің үйлену тойында танысқан екен.
