Былтыр ұйымдастырушылар фестивальдің ашылуына санаулы күндер қалғанда дресс-кодты қатаңдатып, «жалаңаш» көйлектер мен ұзын шлейфі бар көлемді киімдерге тыйым салғаны белгілі. Алайда бұл шектеулер атақты жұлдыздардың Көгілдір жағалауда өздерінің мінсіз образдарымен жұртты таңғалдыруына еш кедергі бола алмады.
Jacquemus және Gucci брендін таңдаған Деми Мур
Биыл қазылар алқасының құрамына енгендіктен, Деми Мур қызыл кілемнен бірнеше рет жүріп өтті. Оның ең есте қаларлық образдарының бірі – франциялық Jacquemus брендінің 2026 жылғы күз-қыс топтамасынан алынған ойнақы The Confetti Dress көйлегі. Қыпша белді пішім мен баллон-белдемшені көмкерген түрлі-түсті ноқатты принт дәл қазір ұшып шығатындай «тірі» конфетти әсерін сыйлады.
Ал 63-жастағы актрисаның енді бір таңғажайып образы ретінде Демна Гвасалияның қолынан шыққан, бейнебір мыжылған қағаздан жасалғандай әсер беретін Gucci брендінің алқызыл көйлегін атауға болады. Деми Мур басты назарды киімнің ерекше ойығына аудару үшін шашын көйлектің ішіне жасырып, образын үлкен моносырғамен толықтырған екен.
Алайда актрисаның Gucci брендінен таңдаған келесі күлгін көйлегі көпшілік ішінде екіұшты пікір тудырып, біраз сынға ұшырады. Желі қолданушылары бұл киімді Notre-Dame de Paris мюзикліндегі Эсмеральданың көйлегіне де, тіпті кәдімгі целлофан пакетке де теңеп жатты.
Chanel образындағы Райли Кио
Канн төрінде Кантемир Балаговтың жаңа Butterfly Jam фильмін таныстырған актриса Райли Кио қызыл кілемге Матье Блази жасаған Chanel кутюрлік топтамасындағы жартылай мөлдір костюммен шықты.
Dior таңдаған Рут Негга
Биылғы қазылар алқасының тағы бір мүшесі Рут Негга өз шығуларының бірінде жасыл атластан тігілген сән-салтанаты келіскен арнайы Dior көйлегін таңдап, образын Chopard әшекейлерімен әрледі.
Gucci көйлегіндегі Изабель Юппер
Осы уақытқа дейін туындыларының саны бойынша (22 фильм) абсолютті рекорд орнатқан «Канн ханшайымы» Изабель Юппер биыл жас актерлер Одесса Эзайон мен Коннор Суинделлске Trophée Chopard сыйлығын табыстады. 73-жастағы актриса қызыл кілемде көздің жауын алатын Gucci көйлегі мен Chopard әшекейлерінің арқасында мінсіз көрінді.
Tom Ford киген Малгоша Бела
Жолдасы, режиссер Павел Павликовскийді қолдап келген польшалық модель әрі актриса Малгоша Бела оның Fatherland фильмінің премьерасы үшін Хайдер Аккерманн жасаған Tom Ford костюмін таңдапты.
Chanel образындағы Сандра Хюллер
Жақында ғана франциялық сән үйінің жаңа амбассадоры атанған Сандра Хюллер қызыл кілемге Chanel-дің эпатажды кутюрлік образымен шықты. Актриса Павел Павликовскийдің «Оскардан» үмітті жаңа Fatherland фильмінде басты кейіпкер Эриканың рөлін сомдаған болатын.
Dior таңдаған Луи Гаррель
2024 жылдың мамырынан бері Dior брендінің ерлер желісін ресми түрде ұсынып жүрген Луи Гаррельдің Канн төрінде дәл осы франциялық сән үйінің образын таңдауы заңдылық еді.
Giorgio Armani киіп келген Шарль Леклер
Жас жұбайлар – «Формула-1» ұшқышы Шарль Леклер мен оның әйелі, модель Александра Сен-Млё фестиваль күндерінің бірінде қызыл кілемнен бірге қол ұстасып өтті. Александра аустралиялық Paolo Sebastian брендінің көйлегін киіп, образын Messika әшекейлерімен толықтырса, Ferrari командасының шабандозы Giorgio Armani смокингімен жарқырады.
Miu Miu образындағы Джиллиан Андерсон
Биылғы Канн кинофестивалінің төрінде жарқыраған Джиллиан Андерсон көрермен назарына өзінің Teenage Sex And Death At Camp Miasma фильмін ұсынды. 57-жастағы жұлдыз қызыл кілемге шығу үшін Miu Miu көйлектерін таңдапты. Естеріңізге сала кетейік, наурыз айында Джиллиан дәл осы Миучча Прада брендінің көрсетілімін қорытындылаған еді.
Miu Miu таңдаған Барбара Палвин
Модель Барбара Палвин мен оның жолдасы, актер Дилан Спроустың қызыл кілемге шығуы да назардан тыс қалмады. Жұлдызды жұп өздерінің тұңғыш сәбилерін күтіп жүргендерін жариялап, Барбара өзінің бұл нәзік жағдайын Miu Miu брендінің ашық көк түсті көйлегімен әдемі атап өтті.
Elie Saab көйлегіндегі Арая Альберта Харгейт
Көпшілікке Чомпу Арая деген есіммен жақсы таныс тайландтық актриса Арая Альберта Харгейт – Канн кинофестивалінің тұрақты әрі ең жарқын қонақтарының бірі. Биыл ол қызыл кілемге Elie Saab Haute Couture SS 2026 топтамасының кутюрлік көйлегімен шықты.
Dior таңдаған Тейлор Расселл
Тейлор Расселл 79-шы Халықаралық Канн кинофестиваліне оңтүстіккореялық Hope ғылыми-фантастикалық хоррор фильмінің жұлдызы ретінде келді. Өзі амбассадоры саналатын Dior сән үйінің көздің жауын алатын көйлегін таңдаған актриса қызыл кілемде мінсіз көрінді.
Prada образындағы Белла Хадид
Белла Хадид франциялық режиссер Жанна Эрридің Garance фильмінің премьерасына арнап тігілген арнайы Prada көйлегімен Канн кинофестивалінің қызыл кілемімен жүріп өтті.
Chanel киген Кристен Стюарт
Chanel брендінің амбассадоры атанған Кристен Стюарт Канн кинофестиваліне дәл осы сән үйінің образдарымен келеді. Биыл актриса бұл шараға франциялық режиссер Кантен Дюпьёнің Full Phil абсурдты қара комедиясының түсірілім тобымен бірге қатысты.
Dior таңдаған Шарлотта Ле Бон
Full Phil картинасының тағы бір кейіпкері – франциялық актриса Шарлотта Ле Бон да Dior образын таңдапты. Ол Тюильри бағында таныстырылған Джонатан Андерсонның алғашқы топтамасындағы жеңіл белдемшемен көзге түсті
