Matcha day party форматында өткен іс-шараның басты тақырыбы – күнделікті қайнаған тірлік пен кәсіби мақсаттарды өзіңе күтім жасаумен үндестіре білу. Ал кештің бас серіктесі, дұрыс тамақтануды дәріптейтін Chou Chou бренді қонақтарға матча негізіндегі ерекше авторлық сусындарын тарту етті.
Жазғы жаңа топтамамен танысу қазіргі таңдағы сән мен талғам жайлы мазмұнды әңгімеге ұласты. Зәуре Розмат пен Almaty Marathon жетекшісі Салтанат Қазыбаева жұмыс пен спортты, отбасы мен жеке уақытты қалай қатар алып жүргендері жөнінде өз тәжірибелерін ортаға салды. Талқылаудың негізгі түйіні сыртқы сұлулық пен ішкі жан дүние тыныштығының үйлесіміне негізделген саналы өмір салтына келіп тірелді.
Бұл кездесу Jimmy Choo үшін тарихи жылдың бір бөлшегі десек артық айтқандық емес. Себебі 2026 жылы брендтің Қазақстан нарығына қадам басқанына тура 10 жыл толып отыр. Осы уақыт аралығында марка елімізде өз орнын ойып тұрып алып қана қоймай, сән мен заманауи өмірді бағалайтын үлкен қауымдастық қалыптастыра білді.