Бұл көрсетілім брендтің Alta Moda және Alta Sartoria жоғары сән желілеріне, сондай-ақ жоғары зергерлік өнер топтамаларына арналған бірнеше күнге созылған іс-шарасының жалғасы іспеттес. Биылғы маусымда Доменико Дольче мен Стефано Габбана Пьетро Масканьидің Cavalleria Rusticana (Ауыл намысы) операсынан шабыт алып, көрсетілімді нағыз ауқымды театр қойылымына айналдырды.
Бірінші қатардағы мәртебелі қонақтар қатарында «Манчестер Сити» мен Норвегия құрамасының шабуылшысы Эрлинг Холанн және The White Lotus сериалы арқылы әлемге танылған британиялық актер Тео Джеймс көзге түсті. Олардың бұл кешке қатысуы көпшіліктің назарын аударып, қызу талқыға түсті.
Alta Sartoria ерлер топтамасында Dolce & Gabbana-ға тән мінсіз италиялық пішім әдемі кестемен, алтын декормен, шілтер және парша маталармен шебер ұштасқан. Көрсетілім опера желісіндегі азалы шеру көрінісімен өте әсерлі аяқталды.
